महालक्ष्मी विकास बैंकले संस्थागत सामाजिक उत्तरदायित्व अन्तर्गत आर्थिक वर्ष २०८२/८३ को पहिलो तथा दोस्रो त्रैमासमा देशका विभिन्न स्थानमा सामाजिक, शैक्षिक र स्वास्थ्यसम्बन्धी कार्यक्रमहरू सम्पन्न गरेको छ।

बैंकले हुम्ला जिल्लाका ज्येष्ठ नागरिकहरूका लागि पूर्ण स्वास्थ्य परीक्षणसहित स्वास्थ्य शिविर र नसर्ने रोग रोकथामसम्बन्धी कार्यशालाका लागि आर्थिक सहयोग गरेको छ। साथै आन्दोलनका क्रममा क्षतिग्रस्त प्रहरी वृत्त सातदोबाटोलाई दैनिक प्रशासनिक प्रयोजनका लागि कम्प्युटर सेट र टेबल उपलब्ध गराएको छ। हुम्लाका विपन्न, दलित समुदाय, अनाथ बालबालिका तथा एकल महिला–पुरुषलाई खाद्यान्न सहयोग पनि गरेको छ।

शिक्षा क्षेत्रमा बैंकले बागलुङ, सल्यान र झापाका विभिन्न विद्यालयमा छात्रामैत्री आधुनिक शौचालय निर्माणका लागि आर्थिक सहयोग गरेको छ। यसैगरी ललितपुरको बालकुमारी आधारभूत विद्यालयका १८० विद्यार्थीलाई न्यानो कपडा वितरण गरिएको छ भने गोरखाका विद्यालयहरूमा अध्ययनरत विद्यार्थीलाई शैक्षिक सामग्री प्रदान गरिएको छ। बैंकले वित्तीय साक्षरता, शिक्षा, स्वास्थ्य, मानव सेवा र दिगो विकासलाई प्राथमिकता दिँदै यस्ता सामाजिक उत्तरदायित्व कार्यक्रमलाई निरन्तरता दिने जनाएको छ।