नेपालपत्र संवाददाता
काठमाडौँ । बैंक तथा वित्तीय संस्थाहरूले पुस महिनाका लागि लागू हुने नयाँ ब्याजदर सार्वजनिक गरेका छन्। सार्वजनिक विवरणअनुसार अधिकांश वाणिज्य तथा विकास बैंकहरूले व्यक्तिगत मुद्दति निक्षेपको अधिकतम ब्याजदर घटाएका छन् भने केही बैंकहरूले मंसिरकै ब्याजदरलाई निरन्तरता दिएका छन्। पुसका लागि कुनै पनि बैंकले ब्याजदर बढाएको देखिएको छैन।
ब्याजदर घटाउने बैंकहरू
प्राप्त सूचनाअनुसार १८ वटा वाणिज्य बैंकमध्ये १४ वटाले पुसका लागि व्यक्तिगत मुद्दति निक्षेपको अधिकतम ब्याजदर घटाएका छन्। ब्याजदर घटाउने बैंकहरूमा कृषि विकास बैंक, कुमारी बैंक, एभरेष्ट बैंक, ग्लोबल आइएमई बैंक, राष्ट्रिय वाणिज्य बैंक, स्ट्यान्डर्ड चार्टर्ड बैंक, सानिमा बैंक, प्रभु बैंक, प्राइम बैंक, नेपाल एसबीआई बैंक, हिमालयन बैंक, नबिल बैंक, लक्ष्मी सनराइज बैंक र नेपाल बैंक रहेका छन्।
यी बैंकहरूले पुसका लागि व्यक्तिगत मुद्दति निक्षेपमा ४ प्रतिशतदेखि ५.५० प्रतिशतसम्मको अधिकतम ब्याजदर कायम गरेका छन्, जुन मंसिरको तुलनामा कम हो।
ब्याजदर स्थिर राख्ने बैंकहरू
पुसमा मंसिरकै ब्याजदरलाई निरन्तरता दिने वाणिज्य बैंकहरूमा सिद्धार्थ बैंक, माछापुच्छ्रे बैंक, एनएमबि बैंक र एनआईसी एसिया बैंक रहेका छन्। यी चारवटै बैंकले पुसमा पनि व्यक्तिगत मुद्दति निक्षेपमा अधिकतम ५ प्रतिशत ब्याजदर कायम गरेका छन्।
विकास बैंकहरूको अवस्था
राष्ट्रियस्तरका अधिकांश विकास बैंकहरूले पनि पुसका लागि ब्याजदर घटाएका छन्। ब्याजदर घटाउने विकास बैंकहरूमा मुक्तिनाथ विकास बैंक, लुम्बिनी विकास बैंक, कामना सेवा विकास बैंक, सांग्रिला विकास बैंक र गरिमा विकास बैंक रहेका छन्। यी बैंकहरूले पुसमा व्यक्तिगत मुद्दति निक्षेपमा ५.५० देखि ५.५५ प्रतिशतसम्मको अधिकतम ब्याजदर कायम गरेका छन्, जुन मंसिरको तुलनामा कम हो।
यद्यपि, महालक्ष्मी विकास बैंक ले भने पुसमा पनि मंसिरकै ब्याजदरलाई निरन्तरता दिएको छ। बैंकले पुसका लागि व्यक्तिगत मुद्दति निक्षेपमा अधिकतम ५.८० प्रतिशत ब्याजदर कायम गरेको छ। पुस महिनाका लागि सार्वजनिक विवरणअनुसार कुनै पनि वाणिज्य वा विकास बैंकले व्यक्तिगत मुद्दति निक्षेपको ब्याजदर बढाएका छैनन्। अधिकांश बैंकहरूको ब्याजदर घट्नुले बजारमा तरलता पर्याप्त रहेको संकेत गरेको देखिन्छ।
