नेपालको निर्यात व्यापारमा क्रमशः सुधार आउन थालेको छ।भन्सार विभागले सार्वजनिक गरेको चालु आवको कात्तिकसम्मको तथ्यांक अनुसार नेपालको कुल व्यापारमा निर्यातको हिस्सा बढ्दै गएको छ । चालु आवको पहिलो चार महिनामा कुल व्यापारको निर्यातको हिस्सा बढेर १३.३० प्रतिशत पुगेको छ । गत वर्षको चार महिनामा कुल व्यापारको निर्यातको हिस्सा ९.३० प्रतिशत रहेको थियो । निर्यात हिस्सा बढ्दा सोही मात्रामा कुल व्यापारमा आयातको हिस्सा भने ९०.७० बाट घटेर ८६.७० प्रतिशतमा झरेको छ ।
विभागका अनुसार चालु आवको पहिलो ४ महिनामा साढे ९३ अर्ब रुपैयाँको सामान निर्यात गरेको छ । चार महिनामा नेपालबाट हुने निर्यात ७७.५१ प्रतिशतले वृद्धि भएको छ । गत वर्ष नेपालले चार महिनामा ५२ अर्ब ६७ करोड रुपैयाँको मात्रै सामान निर्यात गरेको थियो। निर्यात बढ्दो क्रममा रहे पनि चालू आर्थिक वर्ष २०८२-८३ को पहिलो चार महिनामा नेपालको व्यापार घाटा ५ खर्ब १५ अर्ब रुपैयाँ पुगेको छ । गत वर्षको पहिलो चार महिना भन्दा नेपालको व्यापार घाटा ११.९९ प्रतिशतले बढेको थियो।
चालु आर्थिक वर्ष २०८२-८३ को पहिलो चार महिना (साउनदेखि कार्तिकसम्म) को अवधिमा मुलुकको कुल वैदेशिक व्यापार २४.१८ प्रतिशतले वृद्धि भएको छ। गत वर्ष (२०८१-८२) को सोही अवधिमा ५ खर्ब ६६ अर्बको व्यापार भएकोमा यस वर्ष बढेर ७ खर्ब २ अर्ब ९४ करोड ७० लाख रुपैयाँ पुगेको हो। भन्सार विभागका अनुसार कात्तिक महिनासम्म नेपालले ६ खर्ब ९ अर्ब ४५ करोडको बस्तु आयात गरेको छ जुन अघिल्लो वर्ष ५१ अर्ब ३३ अर्ब ८८ करोड रुपैयाँ थियो । नेपालको आयात व्यापार गत आवको भन्दा १८.७१ प्रतिशतले बढेको छ। आयात र निर्यातमा वृद्धिसँगै कुल वैदेशिक व्यापार पनि २४.१८ प्रतिशतले बढेर ७ खर्ब २ अर्ब ९४ करोड रुपैयाँ पुगेको छ । गत वर्ष आयात निर्यात अनुपात ९.७५ गुणा रहेकोमा चालु आवमा यो घटेर ६.५२ गुणा पुगेको छ।
निर्यातमा ठूलो सुधार भए तापनि आयातको उच्च परिमाणका कारण मुलुकको व्यापार घाटा भने बढेको छ । विभागका अनुसार चार महिनामा व्यापार घाटा ५ खर्ब १५ अर्ब ९५ करोड ५४ लाख रुपैयाँ पुगेको छ । यो गत वर्षको सोही अवधिको तुलनामा ११.९९ प्रतिशतले बढी हो ।
