नेपाल राष्ट्र बैंकद्वारा सार्वजनिक गरिएको वित्तीय समावेशीकरण सूचकांकले देशमा वित्तीय पहुँच, प्रयोग र गुणस्तरमा क्रमिक सुधार भएको देखाएको छ। सूचकांकले वित्तीय समावेशीकरणमा उल्लेखनीय प्रगति भए पनि अझै गुणस्तर सुधार र समावेशी सेवामा भने ध्यान दिनुपर्ने देखाएको छ।

नेपालको वित्तीय समावेशीकरण सूचकांक स्कोर २०७८/७९ मा ०.४० बाट बढेर २०८०/८१ मा ०.४७ पुगेको छ । यसले गएका तीन वर्षमा भएको प्रगतिलाई दर्शाउँछ। त्यसैगरी पहुँच सूचांक ०.३८ बाट ०.४७ मा पुगेको छ, जसले वित्तीय संस्था, डिजिटल उपकरण र सेवा पहुँच जनसंख्यामा विस्तार भइरहेको जनाउँछ। प्रयोग सूचांक ०.४३ बाट ०.४९ मा पुगेको छ जुन डिजिटल भुक्तानी, बैंक कारोबार र सेवा उपयोगमा वृद्धिको संकेत हो।

गुणस्तर सूचांक भने ०.३६ बाट ०.४१ मा मात्रै बढेको छ, जसले अझै पनि पारदर्शिता, सन्तुष्टि, र ग्राहक संरक्षणमा सुधारको आवश्यकता रहेको देखाएको छ । 

वित्तीय समावेशीकरण सूचकांकले देशको वित्तीय सेवाहरू समग्र रूपमा सर्वसाधारणसम्म पुग्न थालेको देखाए तापनि, सेवा गुणस्तर, डिजिटल साक्षरता, र सबैका लागि समान पहुँचको ग्यारेन्टी गर्न थप सुधार गर्न आवश्यक रहेको जनाएको छ।