नेपालपत्र संवाददाता
मुलुकमा भित्रने रेमिट्यान्स आप्रवाहमा वृद्धि भएको छ । २०८१ फागुन महिनामा नेपाल भित्रिने रेमिट्यान्सले रेकर्ड राखेको छ । नेपाल राष्ट्र बैंकका अनुसार फागुन महिनामा १ खर्ब ५१ अर्ब २० करोड रुपैयाँ विप्रेषण आएको छ ।
राष्ट्र बैंकले सार्वजनिक गरेको चालु आर्थिक २०८१/८२ को पहिलो आठ महिनाको देशको आर्थिक तथा वित्तीय स्थिति प्रतिवेदन अनुसार कुल विप्रेषण आप्रवाह ९.४ प्रतिशतले वृद्धि भएको छ । आठ महिनाको अवधिमा १० खर्ब ५१ अर्ब ७७ करोड विप्रेषण मुलुक भित्रिएको छ । अघिल्लो वर्ष सोही अवधिमा विप्रेषण आप्रवाह १८.३ प्रतिशतले बढेको थियो ।
गएको आठ महिनामा ३ लाख १७ हजार ६८ ले वैदेशिक रोजगारीका लागि अन्तिम श्रम स्वीकृति (संस्थागत तथा व्यक्तिगत–नयाँ) लिएका छन् । सोही अवधिमा २ लाख १७ हजार ४ सय ३ ले पुनः श्रम स्वीकृति लिएको सरकारी तथ्यांक छ । गत वर्षको सोही अवधिमा २ लाख ८५ हजार ३ सय ५२ अन्तिम श्रम स्वीकृति (संस्थागत तथा व्यक्तिगत–नयाँ) र १ लाख ८२ हजार ७ सय ८३ ले पुनः श्रम स्वीकृति लिएका थिए ।
रेमिट्यान्स बढेसँगै चालु आर्थिक वर्षको आठ महिनामा ३ खर्ब ६८ अर्ब रुपैयाँ विदेशी मुद्रा सञ्चिति थपिएको छ । गत असारको तुलनामा यो १८ प्रतिशतको वृद्धि हो । गत फागुनसम्म कुल विदेशी मुद्रा सञ्चिति २४ खर्ब ९ अर्ब रुपैयाँ नाघेको राष्ट्र बैंकले जनाएको छ ।
