तरलता अभाव देखाउँदै ब्याजदर बढाउने प्रतिस्पर्धामा वाणिज्य बैंकहरु उत्रिएपछि नेपाल राष्ट्र बैंकले हस्तक्षेप गरेको छ । ब्याजदरमा प्रतिस्पर्धाले बजार अनियन्त्रित हुन थालेपछि यस्ताे कडा कदम राष्ट्र बैंकले चालेको हो ।
राष्ट्र बैंकले बैंक तथा वित्तीय संस्थाहरुलाई निर्देशन जारी गर्दै अघिल्लो महिनाको प्रकाशित व्याजदरको १० प्रतिशतले मात्रै बढाउन पाइने व्यवस्था गरिएको जानकारी गराएको छ । राष्ट्र बैंकले गरेको यस्तो व्यवस्था कात्तिक महिनादेखि नै लागू हुने परिपत्रमा उल्लेख छ ।
यस्तै, संस्थागत मुद्दती निक्षेप (बोलकबोल समेत)मा प्रदान गरिने अधिकतम व्याजदर सर्वसाधारणलाई मुद्दती निक्षेपमा प्रदान गरिने अधिकतम व्याजदरभन्दा कम्तिमा एक प्रतिशत विन्दुले कम हुनुपर्ने व्यवस्था राष्ट्र बैंकले गरेको छ ।
हिमालयन बैंकले कात्तिक महिनाको लागि प्रकाशित गरेको व्याजदरमा सर्वसाधारणलाई साढे १० प्रतिशत र संस्थागत निक्षेपकर्तालाई ९बोलकबोलमा० ११।६७ प्रतिशतका दरले व्याज दिने सुचना प्रकाशित गरेकोे थियो ।
कात्तिक महिनाको लागि बैंकहरुले प्रकाशित गरेको व्याजदर असोज महिनाको भन्दा ३० प्रतिशतसम्मले बढाएपछि राष्ट्र बैंक हस्तक्षेपमा उत्रिएको हो । बैंकहरुले कात्तिक ३ गतेभित्र आफ्नो वेबसाइटमा ब्यजदर प्रकाशित गर्नु पर्ने र यसरी संसोधन गरिएको नयाँ व्याजदर कात्तिक ५ गतेभित्रमा दैनिक पत्रिकामा समेत प्रकाशित गर्नुपर्ने राष्ट्र बैंकको निर्देशनमा उल्लेख छ ।
