मौसम पूर्वानुमान महाशाखाले पश्चिमी वायुको प्रभावले नेपालका कतिपय स्थानमा आंशिक बदली तथा हुस्सु एवं कुहिरो लाग्ने सम्भावना भएको भन्दै सतर्कता अपनाउनुपर्ने जनाएको छ । 

महाशाखाले कोशी प्रदेश, बागमती प्रदेश र कर्णाली प्रदेशको पहाडी भूभागमा आंशिक बदली तथा बाँकी भूभागमा मौसम मुख्यतया सफा रहेको र तराईका धेरै स्थानहरूमा हुस्सु लागेको महाशाखाले जनाएको छ ।

आगामी तीन दिनको मौसम पूर्वानुमानका अनुसार आज कोशी प्रदेशका हिमाली क्षेत्रमा आंशिक बदली रहने छ । तराई क्षेत्रमा मुख्यतया सफा रहने सम्भावना रहेको छ । राती हिमाली क्षेत्रमा आंशिक बदली रहने सम्भावना रहेको छ । बागमती, गण्डकी, लुम्बिनी, कर्णाली र सुदूरपश्चिम प्रदेशका हिमाली क्षेत्रमा आंशिक बदली रहने सम्भावना रहेको छ ।

सोमबार देशभरका हिमाली क्षेत्रमा आंशिक बदली रही पहाडी क्षेत्रमा आंशिक बदली रहने छ भने तराई क्षेत्रमा मुख्यतया सफा रहनेछ । राति हिमाली क्षेत्रमा मुख्यतया सफा रहने छ । 

मंगलबार कोशी प्रदेशका हिमाली क्षेत्रमा आंशिक देखि साधारणतया बदली रही एक(दुई स्थानमा फाटफुट देखि हल्का हिमपातको सम्भावना रहेको छ । पहाडी क्षेत्रमा आंशिक देखि साधारणतया बदली रहने छ । तराई क्षेत्रमा मुख्यतया सफा रहने सम्भावना रहेको छ । राती हिमाली क्षेत्रमा आंशिक देखि साधारणतया बदली रहने छ । बागमती, गण्डकी, लुम्बिनी,कर्णाली र सुदूरपश्चिम प्रदेशका हिमाली क्षेत्रमा मुख्यतया सफा रहने सम्भावना रहेको छ ।

बिहानको समयमा देशका तराई तथा उपत्यकाका धेरै स्थानहरूमा हुस्सु कुहिरोको सम्भावना रहेकोले दैनिक जनजीवन, कृषि, स्वास्थ्य,यातायात तथा हवाई उडानमा असर पर्न सक्ने हुनाले आवश्यक सतर्कता अपनाउन महाशाखाको अनुरोध छ ।