अर्थमन्त्री विष्णु पौडेलले केहि समयदेखि मुलुकको अर्थतन्त्र दवावमा रहेको स्वीकार गरेका छन् । राष्ट्रिय बाणिज्य बैंकले आयोजना गरेको ६०औं बार्षिकोत्सव कार्यक्रममा बोल्दै उनले अथतन्त्र दवावमा रहेको र त्यसलाई चिर्न सरकार लागि परेको उल्लेख गरे । उनले भने, ‘सरकारको प्रयासले अर्थतन्त्रमा केही सुधार आएको छ,तर त्यसमा हामी चित्त बुझाएर बस्ने अवस्थामा छैनौं। समग्र अर्थतन्त्रलाई गतिशिल बनाउन लागेको छौं। उत्पादन वृद्धि, रोजगारी सृजना र सवल राष्ट्रिय अर्थतन्त्र बनाउने कुरामा हामीले द्रुत गतिमा  काम गरिहेका छौं।’

बैंक तथा वित्तीय संस्थामा जम्मा भएको तरलतालाई उत्पादन र उत्पादकत्व वृद्धि गर्ने क्षेत्रमा लगानी गर्न उनको आग्रह छ । अहिलेको सरकार औसत काम गरेर बस्ने पक्षमा नरहेको भन्दै मन्त्री पौडेलले समस्याको थुप्रै चाङ रहेको र त्यसलाई एक एक गरेर पन्छाउने जनाए । छोटो समयमा दुरगामी उपलब्धीहरु हासिल गर्न सरकारले चाहेको र अर्थत्नत्रका क्षेत्रमा भएका समस्याहरुलाई प्रभावकारी रुपमा संवोधन गर्न  लागि परेको  उनले बताए ।

सरकारले परिणाममुखी ढंगले काम गर्न चाहेको र अध्यादेश मार्फत २९ वटा ऐनमा संशोधन गरेको बताए। ती अध्यादेशहरु सदन सुरु भएको पहिलो दिनमा टेबुल गर्ने तथा केही सदन र केही प्रतिस्थापन विधेयक मार्फत संशोधन सहित पारित गर्ने उनले जानकारी दिए ।