नेपालपत्र संवाददाता
आउँदो मंसीर १६ गते हुन गइरहेको स्थानीय तह उपनिर्वाचन, २०८१ लाई स्वच्छ, स्वतन्त्र, निष्पक्ष, भयरहित र विश्वसनीय वातावरणमा सम्पन्न गर्न आयोगबाट मुख्य निर्वाचन अधिकृत, निर्वाचन अधिकृत तथा प्रदेश एवम् जिल्ला निर्वाचन अधिकारीहरुसँग अभिमुखीकरण सहितको अन्तरक्रिया कार्यक्रम सम्पन्न भएको छ।
आयोगको कार्यालय, कान्तिपथ काठमाडौमा भौतिक उपस्थिति र अनलाईन दुवै माध्यमबाट सञ्चालित कार्यक्रममा प्रमुख निर्वाचन आयुक्त दिनेश कुमार थपलियाले उपनिर्वाचनका सन्दर्भमा हालसम्म सम्पन्न गरेका तथा आगामी दिनमा गर्नुपर्ने कार्यहरुबारे संक्षिप्तमा प्रकाश पारेका थिए । उनले आआफ्नो काम, कर्तव्य र अधिकार प्रति सवै सचेत र प्रतिवद्ध रहनुपर्ने उल्लेख गरे ।
त्यसैगरी आयुक्त सगुन शमसेर जबराले निर्वाचन आयोगको संवैधानिक दायित्व समेतलाई मध्यनजर गरी उपनिर्वाचनलाई स्वच्छ, स्वतन्त्र, निष्पक्ष र विश्वसनीय बनाउन अन्तरक्रियाले सबैलाई मद्दत पुगेको र सोही अनुसार व्यवस्थापन र कार्यान्वयन पक्षमा ध्यान दिनुपर्ने जनाए ।
अन्तरक्रिया कार्यक्रममा उपनिर्वाचन सम्बन्धी संवैधानिक एवम् कानूनी व्यवस्था, जनशक्ति, सामग्री, आर्थिक, सुरक्षा र सूचना प्रविधिको व्यवस्थापन, मतदान, मतगणना, आयोगको अपेक्षा र धारणा लगायतका विषयमा आयोगका प्रमुख निर्वाचन आयुक्त, निर्वाचन आयुक्त, सचिव र सहसचिवहरूबाट सहजीकरण तथा अन्तरक्रिया गरिएको प्वक्ता नारायण् प्रसाद सापकोटा जनाएका छन् ।
