राष्ट्रिय परीक्षा बोर्ड परीक्षा नियन्त्रण कार्यालय ले २०८० सालको माध्यमिक शिक्षा परीक्षा (एसईई) को नतिजा यो साताभरीमा प्रकाशन गर्ने तयारी गरेको छ।
परीक्षा नियन्त्रक नन्दलाल पौडेलका अनुसार रुजु र प्रोसेसिङका काम बाँकी रहेको र करिब ३ दिनमा सबै काम टुङ्ग्याउने कार्यालयको योजना छ। यस वर्ष सैद्धान्तिक र प्रयोगात्मक परीक्षाको नतिजा फरक गरी सार्वजनिक गरिँदैछ, जसमा सैद्धान्तिक तर्फ ७५ अङ्कको परीक्षामा ३५ प्रतिशत (२७ अङ्क) अनिवार्य ल्याउनै पर्नेछ।
२०८० चैत्रमा ४ लाख ९१ हजार ४९७ विद्यार्थीले परीक्षा दिएका थिए। शिक्षा मन्त्रालयले ‘लेटर ग्रेडिङ निर्देशिका, २०७८’ अनुसार नतिजा सार्वजनिक गर्न लागेको हो। निर्देशिका अनुसार सैद्धान्तिकमा ३५ प्रतिशत र प्रयोगात्मकमा ४० प्रतिशत अङ्क ल्याउनुपर्नेछ। ३५ प्रतिशतभन्दा कम अङ्क ल्याउने विद्यार्थीले पुनः ग्रेड वृद्धि परीक्षामा सहभागी हुनुपर्नेछ।
