इन्टरनेट सेवाप्रदायक संघ (इस्पान) ले इन्टरनेट सरकारले  सेवा उ‌द्योग नै धराशायी हुने अवस्था सिर्जना भएको जनाएको छ । सूचना, सञ्चार तथा प्रविधि मन्त्रालय र दूरसञ्चार प्राधिकरणले विदेशी मुद्रा सम्बन्धी सिफारिस नदिँदा अन्तर्राष्ट्रिय इन्टरनेट ब्याण्डविथ सेवा अवरुद्ध हुन पुगेको इस्पानले जनाएको हो । इन्टरनेटको पहुँच सुनिश्चित गर्ने कार्यमा मन्त्रालय र नेपाल दूरसञ्चार प्राधिकरण दुवै जिम्मेवार र संवेदनशील हुनुपर्ने उसले बताएको छ ।

इस्पानले तेह्र महिनादेखि दूरसञ्चार प्राधिकरण र सञ्चार तथा सूचना प्रविधि मन्त्रालयले विदेशी मुद्रा सिफारिस नदिँदा एयरटेललगायतका अपस्ट्रिम सेवा प्रदायकहरुले भुक्तानी नपाएको गुनासो गरेको छ । आइस्पानले जारी गरेको विज्ञप्तिमा विदेशी मुद्रामा भुक्तानी दिन नपाउँदा अन्तर्राष्ट्रिय इन्टरनेट ब्याण्डविथ सेवा अवरुद्ध भएको स्मरण गराएको छ।

‘सेवा प्रदायकहरूले भुक्तानी नभएमा इन्टरनेट सेवा अवरुद्ध गर्ने भनि पत्र पठाएका थिए र उक्त पत्र समेत इन्टरनेट सेवा प्रदायक सङ्घ इस्पानमार्फत नेपाल दूरसञ्चार प्राधिकरण र सञ्चार तथा सूचना प्रविधि मन्त्रालयलाई जानकारी गराएका थियौँ । मन्त्रालय र प्राधिकरणलाई पटकपटक जानकारी गराउँदा समेत यस विषयलाई गम्भीरतापूर्वक लिइएको छैन । जसकारण इस्पानले आफूले नेटवर्क सेवा प्रदायकहरुलाई प्रदान गर्दै आइरहेको सेवा अवरुद्ध गरेको थियो,’ इस्पानद्वारा जारी विज्ञप्तिमा भनिएको छ । 

डिजिटल नेपाल निर्माणमा इन्टरनेट सेवा प्रदायकले महत्त्वपूर्ण र अपरिहार्य भूमिका खेल्दै आएको र दसौं हजारौलाई रोजगारी दिई अर्बोको लगानी भएको निजी क्षेत्रका इन्टरनेट सेवा प्रदायकलाई प्रोत्साहन गरी लगानीको सुरक्षा गर्ने दायित्व नेपाल सरकारको रहेको इस्पानले जनाएको छ । आइस्पानले मन्त्रालयबाट विदेशी मुद्रा सिफारिस पाउनासाथ विदेशी अपस्ट्रिम सेवा प्रदायकहरुलाई अविलम्ब विदेशी मुद्राको भुक्तानी गर्ने पनि इस्पानले जनाएको छ ।