बीमा कम्पनीहरूले कृषि बीमालेख स्थगन गर्ने जनाएका छन् । सरकारले कृषि बीमा वापतको २ अर्ब रुपैयाँ भुक्तानी नदिएपछि कृषि सम्बन्धि बीमालेख चैत्र १ गतेबाट जारी नगर्ने चेतावनी बीमा कम्पनीहरूले दिएका हुन् ।
कृषि बीमाको अनुदान वापतको बाँकी रकम सरकारले नदिएपछि नेपाल बीमक संघले प्रेस विज्ञप्ती जारी गर्दै कृषि सम्बन्धि बीमालेखको पुरा बीमाशुल्क प्राप्त भएपछि मात्र बीमालेख जारी गर्ने बताएको छ ।
संघले भनेको छ, ‘बीमा ऐन २०७९ अनुसार बीमालेखहरू उधारोमा जारी गर्न नपाइने भएकोले कृषि मन्त्रालय तथा विभागलाई पटक पटक जानकारी गराईएको हो । चैत्र १ गतेदेखि कृषिसँग सम्बन्धित बीमालेखको पनि बीमाशुल्क पुरा भूक्तान नभएसम्म बीमालेख जारी नहुने सर्वसाधारण तथा सरोकारवाला निकायलाई जानकारी गराउँदछौ ।’
सरकारले २०६९ सालदेखि कृषक र कृषिलाई प्राथमिकता दिई कृषि बीमाशुल्कमा क्रमश: अनुदान दिँदै आएको छ । विगत १० वर्षदेखि बीमा कम्पनीहरूले नेपाल बीमा प्राधिकरणको निर्देशिका बमोजिम कृषि बीमालेख जारी गर्ने, क्षति हुँदा क्षतिको दाबी भूक्तानी गर्ने गर्दै आएका छन् तर सरकारले तोकेको अनुदान १ वर्षपछि मात्र प्राप्त हुने गरेको बीमक संघले जनाएको छ ।
सरकारले कृषि बीमाशुल्कमा तोकेको अनुदान रकमवापद बीमा कम्पनीहरूलाई हालसम्म २ अर्ब रुपैयाँ भुक्तानी दिन बाँकी रहेको छ । सो अनुदान रकम उपलब्ध गराउन सरोकारवाला निकायहरु कृषि तथा पशुपछि मन्त्रालय, कृषि विभाग र बीमा प्राधिकरणमा ताकेता गर्दा समेत सुनुवाइ नभएको गुनासो बीमा कम्पनीहरुको छ ।
