राष्ट्रिय तथ्यांक कार्यालयले कृषि गणना २०७८ को प्रतिवेदन सार्वजनिक गरेको छ । अनुसार १० वर्षको अवधिमा खेतिपाती गर्नेको संख्या ७.६१ प्रतिशतले बढेको छ। कृषि गणना २०७८ को सार्वजनिक तथ्यांक अनुसार ३९ लाख ९९ हजार परिवार खेतीपाती आवद्ध छन् भने १ लाख ३२ हजारले पशुपंक्षी मात्र पाल्ने गरेका छन् ।
कृषिगणना अनुसार नेपालमा जम्मा घरपरिवारमध्ये ६२ प्रतिशत कृषक परिवार रहेको पाइएको छ भने अघिल्लो कृषिगणनाले यस्तो कृषक परिवारको प्रतिशत ७१ देखिएको थियो ।
२०६८ को विवरण अनुसार ३७ लाख १६ हजार परिवार खेतिमा र १ लाख १६ हजार पशुपंक्षी पालनमा थिए । हरेक १० वर्षमा हुने गणनाको नतिजा कार्यालयले बिहीबार सार्वजनिक गरेको हो। कृषि गणना २०७८ अनुसार मुलकमा अहिले २२ लाख हेक्टर जग्गामा मात्रै कृषि कार्य भइरहेको छ । विगत १० वर्षमा ३ लाख हेक्टर कृषियोग्य जग्गा घटेको तथ्यांकले देखाएको छ ।
राष्ट्रिय कृषि गणना २०६८ मा २५ लाख हेक्टर कृषियोग्य जमिन थियो । हाल २२ लाख हेक्टर मात्रै कृषियोग्य जमिन छ । अस्थायी बाँझो जग्गा दोब्बरले बढेको कृषि गणनाले देखाएको छ । कृषि गणना २०६८मा ३० हजार हेक्टर अस्थायी बाँझो जग्गा भएपनि अहिले ६० हजार हेक्टर जग्गा अस्थायी बाँझो छ ।
वि.सं. २०१८ सालदेखि हरेक दश/दश वर्षमा कृषिगणना गर्दै आएको राष्ट्रिय तथ्याङ्क कार्यालय ले २०७८ चैत १ गतेदेखि ७७ वटै जिल्लामा कृषिगणना कार्यालय स्थापना गरी २०७९ वैशाख ६ देखि जेठ १९ सम्म सातौँ राष्ट्रिय कृषिगणनाको स्थलगत तथ्याङ्क सङ्कलन कार्य सम्पन्न गरेको थियो ।
