पूर्व सभामुख तथा एनेकपा माओवादीका नेता कृष्णबहादुर महराका छोरा राहुल महरालाई प्रहरीले पक्राउ गरेको छ । ९ केजी सुन तस्करी प्रकरणमा केन्द्रीय अनुसन्धान ब्यूरो (सिआइबी) ले राहुललाई बुधबार काठमाण्डाैबाट नियन्त्रणमा लिएको प्रमुख एआईजी किरण बज्राचार्यले जनाएकी हुन् ।
२०७९ पुस १० मा दुबईबाट विद्युतीय चुरोट ‘भेप’मा लुकाएर सुन तस्करी गर्ने समूहसँग माओवादी उपाध्यक्ष कृष्णबहादुर महरा र उनको छोरा राहुलको सम्पर्क देखिएको थियो । ‘भेप’मा लुकाएर सुन ल्याउने समूहका चिनियाँ नागरिक दाओजिन वाङसँग उनीहरूको सम्पर्क देखिएको हो । वाङसँग माओवादी उपाध्यक्षसमेत रहेका महरा र छोरा राहुलले २५६ पटक संवाद गरेको प्रतिवेदन यसअघि नै सीआईबीले दिएको थियो ।
केन्द्रीय अनुसन्धान ब्यूरोले महरा र उनका छोरा राहुललाई सुन ल्याउने समूहका ‘मुख्य योजनाकार’ किटान गरेर अनुसन्धान प्रतिवेदन बुझाएको थियो । अनुसन्धान प्रतिवेदनमा ‘मुख्य योजनाकार’ किटान गरेर बयान समेत नगराएको भन्दै जिल्ला सरकारी वकिल कार्यालयले उनीहरूमाथि अनुसन्धान गर्न प्रहरीलाई निर्देशन दिएको थियो । तर उनीहरु अनुसन्धानको दायरामा आएका थिएनन् । महरा बाबुछोरालाई पक्राउ गरी अनुसन्धान गर्नुपर्ने आवाज उठ्नुका साथै माओवादी नेतृत्वको सरकार आफ्ना पार्टीका कार्यकर्ता जोगाउन लागिपरेको भन्दै आलोचना हुने गरेको छ ।
