बद्रीनाथ अधिकारी
विद्वान युवा अर्थशास्त्री डा. स्वर्णिम वाग्ले बृटेन लगायत विश्वका विभिन्न विकसित देशका विश्वविद्यालयमा अध्ययन गरेर आफ्नो एक प्रकारको पहिचान बनाउन सफल युवा मानिनुहुन्छ । उहाँले लेख्नु भएका लेख रचनाहरु विश्वका विकसित भनिने देशहरुदेखि विश्वका विकासशील र अल्प विकसित देशका अर्थतन्त्रहरु के कसरी चलेका छन् ? त्यहाँको राजनीतिक प्रणाली खाशगरी शासन, सुशासनका कुरा अनि विभिन्न समयमा बेलायत, अमेरिका, फ्रान्स जर्मनी, पूर्वी एशिया, चीन, जापान, भारत नेपाल लगायतका देशहरु विकास हुनु र पछि पर्नुका कारणहरुमा राजनीतिक प्रणाली, शासन औद्योगिकरण, छिमेकी राष्ट्रहरुसँगको सम्वन्ध र समस्याहरुको बारेमा गर्नु भएको उहाँको विश्लेषण खाशगरी आर्थिक विकास, पछाडि पर्नुका कारणहरु आदि उहाँले औंल्याउनु भएको छ । उहाँका लेखहरुको सँगालो ‘अतृप्त अवसर’ सर्सरी पढ्दा मैले यही पाए । ती कुराहरुसँग असमहत हुनुपर्ने कारण म पनि देख्दिन ।
तर जहाँसम्म नेपालले अपनाएको राजनीतिक प्रणाली र प्रणाली स्थापित गरी स्थायित्व दिन नसक्नुका कारक तत्वहरु, नेपाली जनताका मूल समस्या, यहाँको पेशागत समस्या र जोड दिनुपर्ने क्षेत्र, श्रोत साधनको हिसाबले खाशगरी प्राकृतिक श्रोत साधनले भरीपूर्ण मुलुक हुँदाहुँदै पनि किन विकास हुन सकेको छैन ? यसको दोषी पक्ष को र किन हो ? समस्या को कसबाट सिर्जित छ ? त्यसको समाधानका तत्कालीन उपाय के हुन् अनि दीर्घकालीन उपाय के हुन् भन्ने कुरा भने ठोसरुपमा बिद्वान यूवा अर्थशास्त्रीका रचनामा पाउन पाए राम्रो हुन्थ्यो कि ? भन्ने मलाई लागेको छ । अपेक्षा गरौं भोलिका दिनमा आउने छन् ।
भरतपुर, चित्तवन
