मंगलबार बसेको मन्त्रिपरिषद् बैठकले विभिन्न वस्तु आयातमा लगाइएका प्रतिबन्ध हटाउने निर्णय गरेको । मन्त्रिपरिषद् बैठकले आगामी २९ मंसिरदेखि लागू हुनेगरी गाडी, मदिरा, मोबाइल र मोटरसाइकल आयातमा लगाइएके प्रतिबन्ध हटाउने भएको हो ।
मन्त्रिपरिषद् बैठकले ४ प्रकारका विलासी वस्तु आयातमा कायम रहेको प्रतिबन्ध २९ मंसिर पछि नलम्ब्याउन उद्योग, वाणिज्य तथा आपूर्ति मन्त्रालयलाई सैद्धान्तिक सहमति दिने निर्णय गरेको बताइएको छ ।
मन्त्रिपरिषद्को निर्णय राजपत्रमा प्रकाशित भएपछि आयात प्रतिबन्ध फुकुवा हुनेछ । सरकारको ढुकुटीमा विदेशी विनिमय सञ्चिति कम हुँदै गएपछि वाणिज्य मन्त्रालयले गत २०७९ वैशाखदेखि १० प्रकारका विलासी वस्तुमा आयात प्रतिबन्ध घोषणा गरेको थियो ।
सरकारले प्रतिबन्ध थप परिस्कृत गर्दै ६ प्रकारका वस्तुहरुको प्रतिबन्ध हटाएर ५० हजार डलर भन्दा माथिका गाडी, ३ सय डलर भन्दा महँगो मोबाइल, सबै प्रकारका विदेशी मदिरा र १५० सीसी भन्दा माथिका मोटरसाइकल आयात प्रतिबन्ध २९ मंसिरसम्म लम्ब्याइएको थियो । सरकारको निर्णयपछि अब १ पुस एकदेखि यी वस्तुहरु आयात गर्न पाइने छ ।
गाडी आयातमा प्रतिबन्धले गर्दा यस क्षेत्रको व्यवसाय नै धराशायी नेपाल अटोमोबाइल्स एशोसिएसन (नाडा)ले सरकारले आयात फुकुवा नगरे मंसिर २२ गते आन्दोलन गर्ने चेतावनी दिएको थियो । व्यवसायीको चेतावनीपछि सरकारले ती वस्तुको आयातमा लगाएको प्रतिबन्ध फुकुवा गरेको हो ।
