आर्थिक मन्दीको प्रभाव बढ्दै जाँदा निर्जीवन बीमा व्यवसायमा संकुचनमा गएको छ । बैंकिङ कर्जा प्रवाहमा ह्रासले समग्र अर्थतन्त्र संकुचनमा गएकोले त्यसको प्रभाव बीमा व्यवसायमा पनि देखिएको हो । पछिल्ला तथ्याङ्क अनुसार अटाेमाेबाइल बजारमा ७८ प्रतिशतसम्मले माग घटेको छ भने स्टिलको माग ६१ प्रतिशत घटेको छ ।
निर्जीवन बीमा कम्पनीको बजार प्रमुख रूपमा अटोमोबाइल बिजनेसमा आश्रित छ । नेपाल राष्ट्र बैंकले विदेशी मुद्रा सञ्चय घट्न नदिन सवारी आयातमा कडाइ गरेकाले याे व्यवसाय स्थिर बनेकाे छ । अटो मोबाइलकाे मागमा भारी गिरावट आउँदा प्रत्यक्ष असर बीमा कम्पनीमा पर्छ । अर्को तर्फ बैंकले कर्जा प्रवाह नगर्दा आवासिय घर तथा अपार्टमेन्टको निर्माण ठप्प छ । जसले गर्दा स्टिल सिमेन्टको मागमा पनि गिरावट आएको छ । बैंकहरुले घर कर्जा प्रवाह गर्दा घरको अनिवार्य बीमा गराउने गर्दछन् ।
यी कारणहरूले चालु आर्थिक वर्षका लागि २५ प्रतिशत वृद्धिको लक्ष्य राखेका कम्पनीहरुको वृद्धिदर ५ प्रतिशत आसपास मात्र रहेको छ । अघिल्लो आर्थिक वर्षको कार्तिक महिनामा निर्जीवन बीमा कम्पनीले २ अर्ब ८७ करोड रुपैयाँ बीमा शुल्क आर्जन गरेका थिए । यस वर्षको कार्तिकमा २ अर्ब ५२ करोड रुपैयाँमा सीमित भएको छ । कम्पनीहरूले गएकाे असोजमा ३ अर्ब ५ करोड ८३ लाख रुपैयाँ बराबरको बीमाशुल्क संकलन गरेका थिए ।
