गरिमा विकास बैंकको मोबाईल बैकिङ्ग एप ‘बटुवा’ बाट अब नेपालपे क्युआर स्क्यान गरी भुक्तानी गर्न सकिने भएको छ ।
बैंकका ग्राहकहरुले बटुवा एपको प्रयोग गरेर विभिन्न मर्चेन्ट तथा पेमेन्ट गेटवेहरुमा रहेको नेपाल पे क्युआर सजिलै भुक्तानी गर्न सक्ने भएका हुन् । साथै बैंकले नेपाल पे क्युआरमा विभिन्न मर्चेन्टहरु आवद्ध गराउने काम समेत शुरु गरेको छ ।
नेपाल राष्ट्र बैंकले प्रकाशित गरेको नेपाल क्युआर स्ट्याण्डर्डको मूल पूर्वाधारको रुपमा नेपाल पे क्युआर सञ्चालनमा आएको हो । यस अन्तर्गत सदस्य बैंक वित्तीय संस्थाहरु, भुक्तानी सेवा प्रदायकहरु र अन्य भुक्तानी प्रणाली सञ्चालकहरुले छुट्टै स्कीमको रुपमा र मर्चेन्ट वा अन्य क्युआर स्किमसँग अन्तरआवद्धता कायम गरी प्रयोग गर्न सकिने व्यवस्था रहेको छ ।
यसरी गरिमा विकास बैंकको मोबाईल बैङ्गिकमा नेपालपे क्युआर जोडिँदा रिटेल स्तरमा हुने विद्युतीय भुक्तानीमा थप बृद्धि हुने अपेक्षा बैंकको छ ।
गरिमा विकास बैंकले नेपालभरी १२१ वटा शाखा कार्यालयहरु र ५१ एटिएममार्फत सेवा प्रदान गरिरहेको छ।
