हिजो सम्पन्न प्रतिनिधि सभा एवं प्रदेश सभा निर्वाचनको मतगणना शुरु भएको छ । मतगणनाको शुरुवाती रुझानले मतदाताहरुमा फरक रुझान देखिएको छ । गणना शुरुवात भएका अधिकांश स्थानमा स्थापित दलका परिचित अनुहारभन्दा अघिअघि नवस्थापित दल र स्वतन्त्र उमेदवार हावी देखिएका छन् ।
यो चुनावबाट रवि लामिछानेद्वारा स्थापित नेपाल स्वतन्त्र पार्टी र सीके राउतको दल जनमत पार्टी को उदय हुने देखिएको छ । मतदाताको परम्परागत मत अधिकांश स्थानमा फेरिएको हुनसक्ने आँकलन गरिएको छ । राजधानी काठमाण्डौ र मुलुकका विभिन्न शहरी क्षेत्रमा आएको प्रारम्भिक मतले यस्तो अनुमानलाई नै सघाउ पुग्ने देखिन्छ । यसपटकको मतदानको रुझान हेर्दा दलहरुले प्राप्त गर्ने समानुपातिक मतमा समेत ठूलो अन्तर आउने देखिन्छ ।
घण्टी चुनाव चिन्ह रहेको राष् स्वतन्त्रपार्टीले विभिन्न चुनाव क्षेत्रमा अग्रता लिएको छ । चितवन २, कास्की २ मा नेस्वापाले अग्रता लिएको छ भने काठमाण्डौका विभिन्न क्षेत्र र ललितपुर ३ मा प्रतिस्पर्धामा रहेको छ । सप्तरीको २ नम्बर निर्वाचन क्षेत्रमा जनमत पार्टीका अध्यक्ष सीके राउतले जसपा अध्यक्ष उपेन्द्र यादवलाई अहिलेसम्म तेश्रो स्थानमा सीमित गरिदिएका छन् ।
भक्तपुर निर्वाचन क्षेत्र नं. २ मा नेपाली काँग्रेसका दुर्लभ थापाले नेकपा एमालेका महेश बस्नेतमाथि अग्रता लिएका छन् । काठमाण्डौको निर्वाचन क्षेत्र नं १ मा नेपाली काँग्रेसका प्रकाशमान सिंह र राष्ट्रिय प्रजातन्त्र पार्टीका रविन्द्र मिश्रबीच प्रतिस्पर्धा देखिएको छ ।
