जबरजस्ती करणीको कसूरमा राष्ट्रिय क्रिकेट टोलीका निलम्बित कप्तान सन्दीप लामिछानेविरुद्ध मुद्दा दर्ता भएको छ ।
जिल्ला सरकारी वकिलको कार्यालय, काठमाडौंले जिल्ला अदालतमा सोमबार अभियोग पत्र दर्ता गराएको हो । जिल्ला प्रहरी परिसर, काठमाडौंले रायसहित बुझाएको अनुसन्धान प्रतिवेदनका आधारमा सरकारी वकिलको कार्यालयले अभियोग पत्र पेश गरेको हो ।
प्रहरीले लामिछानेमाथि अनुसन्धान सकेर मुलुकी अपराध संहिताको जबरजस्ती करणी गर्न नहुने कसूरमा सजायको मागदाबीसहित अनुसन्धान प्रतिवेदन पेश गरेको थियो ।
संहिताको दफा २१९ को उपदफा ३ को घ मा पीडित १६ वर्ष वा त्यसभन्दा बढी १८ वर्षभन्दा कम उमरको भए १० देखि १२ वर्षसम्म कैद सजायको व्यवस्था छ ।
भदौ २१ गते पीडित किशोरीले जबरजस्ती करणीको कसूरमा लामिछानेविरुद्ध किटानी जाहेरी दिएकी थिइन् । जाहेरी परेको दुईदिनपछि जिल्ला अदालत, काठमाडौंले उनलाई पक्राउ गर्न प्रहरीलाई अनुमति दिएको थियो । केहि समय विदेशमा सम्पर्कविहीन बनेका लामिछानेले अशोज २० त्रिभुवन विमानस्थलमा प्रहरीसमक्ष आत्मसमर्पण गरेका थिए ।
