काठमाडौं । अमेरिकाले चीनको शिनजिआङ प्रान्तका उगुर मुसलमानसम्बन्धी विषयमा संयुक्त राष्ट्रसंघको मानवअधिकार परिषद्मा ल्याएको प्रस्ताव पारित हुन सकेन ।
भारतले भने अमेरिकाको सो प्रस्तावमा मतदान गरेन । पाकिस्तानसमेत कतिपय मुस्लिम देशले अमेरिकाको यो प्रस्तावको विरोधमा मतदान गरे ।
राष्ट्र संघको मानव अधिकार परिषद्मा ७ अक्टोबरमा उगुर मुसलमान विरुद्धको मानवअधिकार हनन सम्बन्धि विषयमा छलफल गर्नुपर्ने माग राखी सो प्रस्ताव ल्याइएको थियो ।
यो प्रस्ताव प्रस्तुत गर्न अमेरिकालाई बेलायत, क्यानाडा, डेनमार्क, फिनल्यान्ड, आइसल्यान्ड, नर्वे र स्विडनजस्ता देशले साथ दिएका थिए ।
यो प्रस्तावमाथि ४७ सदस्य भएको यो परिषदमा मतदान हुँदा परिणाम चीनको पक्षमा गयाे ।अमेरिकाले ल्याएको यो प्रस्तावको विरोधमा १९ देश थिए । यसमा पाकिस्तान र इन्डोनेसियालगायत कतिपय मुसलमान देश सामेल थिए ।चीनको विरोधमा अथवा अमेरिकाको समर्थनमा १७ देशले मात्र मतदान गरे ।
चीनको समर्थनमा साथ दिने देशहरूमा बोलिभिया, क्यामरुन, चीन,क्युबा, इरिट्रिया,ग्याबन, इन्डोनेसिया, कजाकिस्तान, मारिटानिया,नामिबिया, नेपाल, पाकिस्तान,कतार,सेनेगल,सुडान, युएई ,उज्बेकिस्तान, आइभरी कोस्ट र भेनेजुएला छन् ।
यसैगरी अमेरिकी प्रस्तावको समर्थनमा चेक रिपब्लिक, फिनल्यान्ड,फ्रान्स, जर्मनी, होन्डुरस, जापान, लिथुआनिया, लग्जम्बर्ग,मार्शल आइसल्यान्ड,मोन्टेग्रो, निदरल्यान्डस्, पराग्वे, पोल्यान्ड, अमेरिका, ब्रिटेन, रिपब्लिक अफ कोरया र सोमालिआ रहेका छन् ।
भारत लगायत ११ देशले यो प्रस्तावको कुनै पनि पक्षमा मतदान नगरी तटस्थ बसेका थिए ।
