चालू आर्थिक वर्षको दुई महिनामा दुई खर्ब भन्दा बढीको बस्तु आयात भएको छ । भन्सार विभागको तथ्याङ्क अनुसार चालु आर्थिक वर्षको दुई महिनाको अवधिमा मुलुकले २ खर्ब ७३ अर्ब ५९ करोड ९६ लाख ५२ हजार रुपैयाँको वस्तु आयात गरेको हो ।
गत वर्षको सोही अवधिमा नेपालले ३ खर्ब १४ अर्ब ५१ करोड ७१ लाख रुपैयाँको आयात गरेको थियो । जुन गत वर्षको तुलनामा १३ प्रतिशतले आयात घटेको हो । विभागको तथ्याङ्अनुसार दुई महिनाको अवधिमा नेपालले २८ अर्ब ६८ करोड ४ लाख ३७ हजार रुपैयाँको वस्तु निर्यात गरेको छ । नेपालले गत वर्षको सोही अवधिमा ४४ अर्ब ३ करोड ९५ लाख ९१ हजार रुपैयाँको वस्तु निर्यात गरेको थियो । जुन गत बर्षको तुलनामा ३४.८८ प्रतिशतले निर्यात घटेको देखिएको छ ।
यस अवधिमा सबैभन्दा बढी डिजेल आयात गरेको छ । १८ अर्ब ४२ करोड १५ लाख रुपैयाँको डिजेल आयात गरेको छ भने १२ अर्ब १८ करोड ९४ लाख रुपैयाँको पेट्रोल आयात गरेको छ । मुलुकले दुई महिनाको अवधिमा सबैभन्दा बढी पामोलिन तेल २ अर्ब ४७ करोड ४९ लाख रुपैयाँको निर्यात गरेको छ भने २ अर्ब १३ करोड ५५ लाख रुपैयाँको कार्पेट निर्यात गरेको छ ।
