काठमाण्डौ महानगरका मेयर पदका उमेदवार बालेन्द्र शाहले ५० हजार मत कटाएका छन् । मंगलबार बिहान १० बजेसम्म १ लाख ५० हजार मत गणना भइसकेको छ भने करिब ४० हजार मतमात्र गणना हुन बाँकी छ । हालको ट्रेण्ड अन्तिमसम्म कायम रहे ३ मुख्य प्रतिस्पर्धी प्रत्येकले करिब ८ देखि ११ हजार मत थप्नेछन् । बालेन्द्र शाह र दोश्रो हुने उमेदवारबीच करिब १८ देखि २० हजार मतको फरक अन्तिमसम्म रहेन देखिन्छ । यसर्थ काठमाण्डौको मेयरमा बालेन्द्र शाहले ५९ देखि ६२ हजार मत ल्याई विजयी हुने सुनिश्चित झैं देखिएको छ ।
मतगणना अनुसार निकटतम प्रतिद्वन्दी सिर्जना सिंह भन्दा बालेन्द्र १९३८७ मतले अगाडि रहेका छन् । सिंहको मत ३१२९३ रहेको छ । त्यसैगरी अर्का उमेद्वार केशव स्थापितले मत ३०६७४ मत प्राप्त गरिसकेका छन् । उनी सिंहभन्दा करिब ७०० मतले पछाडि रहेका छन् ।
चौंथो स्थानमा गुठी आन्दोलनमा अग्रणी भूमिका निभाएका स्वतन्त्र उमेदवार सुमन सायमीले ८८३० मत ल्याएका छन् ।
महानगरका ३२ मध्ये २३ वटा वडाको परिणाम आइसकेको छ भने वडा नं १३ देखि २१ को गणना भइरहेको छ । वडाअध्यक्षमा नेपाली काँग्रेसले १४ र नेकपाएमालले ८ वटा वडामा जित हासिल गरेकाे छ ।
नेपाली काँग्रेस र नेकपा एमालेको कोर एरिया मानिएका वडा नं १२ देखि २७ को गणना जारी रहेको भएता पनि ती क्षेत्रबाट समेत शाहले न्यूनतम १६ देखि ४५ प्रतिशतसम्म मत पाइरहेका छन् । गणना हुन बाँकी १०÷१० हजार भन्दा धेरै मत रहेका वडा १६ सोह«खुट्टे र वडा नं १५ कलंकी बल्खुमा शाहको अग्रता रहेको छ ।
उपमेयरमा भने नेकपा एमालेबाट उमेदवार बनेकी सुनिता डंगोल विजयी हुने संकेत प्रारम्भिक मतगणना देखिनै देखिएको थियो । दोश्रो स्थानमा रहेका गठबन्धनका कलम चिन्हका उमेदवार रामेश्वर श्रेष्ठले डंगोलभन्दा धेरै पछि रहेका छन् । डंगोलले ४६ हजार मत प्राप्त गर्दा श्रेष्ठको मत १६ हजार मात्र पुगेको छ । राप्रपाकी उमेदवार बिनिता मगैयाले ८६०० मत सहित तेश्रो स्थानमा रहेकी छिन् । आँखीझ्याल चिन्हबाट निर्वाचन लडेकी विद्या श्रेष्ठ ६४०० मत सहित चौंथो स्थानमा रहेकी छिन् ।
