गौतमबुद्ध अन्तर्राष्ट्रिय विमानस्थल आजदेखि सञ्चालनमा आएको छ। विमानस्थलको औपचारिक उद्घाटनको क्रममा नेपाल वायुसेवा निगमको न्यारोबडी जहाज र कुबेतबाट आएको जजिरा एयरवेजको जहाज अवतरण गरेका छन् । यससँगै नेपालमा दोस्रो अन्तर्राष्ट्रिय विमानस्थलबाट व्यवसायिक उडान प्रारम्भ भएको छ ।
विमानस्थल कार्यालयका अनुसार नेपाल वायुसेवा निगमको पहिलो जहाज आज बिहान ६ बजेर ५५ मिनेटमा र जजिराको जहाज ७ बजेर ८ मिनेटमा अवतरण गरेका हुन् । यससँगै नेपालमा दोस्रो अन्तर्राष्ट्रिय विमानस्थलबाट व्यवसायिक उडान प्रारम्भ भएको छ ।
निगमको न्यारोवडी जहाजले काठमाडौंबाट उडान गरेको हो भने जजिराको जहाज दोहाबाट कुबेत ट्रान्जिट गरेर गौतमबुद्ध एयरपोर्टमा अवतरण गरेको हो ।
यद्यपि गौतम बुद्ध अन्तर्राष्ट्रिय विमानस्थलले जेठ २९ गतेदेखि मात्र नियमित उडान शुरु गर्ने नेपाल नागरिक उडड्यन प्राधिकरणले जनाएको छ ।
त्रिभुवन अन्तर्राष्ट्रय विमानस्थल सञ्चालनमा आएको ७४ वर्षपछि मुलुकमा दोश्रो अन्तर्राष्ट्रिय विमानस्थल सञ्चालनमा आएको हो ।
