भूमि बैंक परियोजना किसानमारा भएको भन्दै चार किसान संगठनले विरोध जनाएका छन् ।
किसानलाई जगाउने, उठाउने, उनीहरुको जीवनमा विकसित ऊर्जा र समुन्नति पैदा गर्ने तथा राष्ट्रिय बजार अभिबृद्धिकासाथ किसानको जीवनमा खुशियाली ल्याउने र राष्ट्रिय औद्योगिकरणको सबल आधार तयार गर्ने बैज्ञानिक क्रान्तिकारी भूमिसुधारको महत्वपूर्ण राष्ट्रिय मुद्दालाई विषयान्तर गर्न ल्याउन थालिएको भूमि बैंकको धारणा किसान बिरोधी र अन्तत राष्ट्रिय हित बिरोधी रहेको र यसले किसानलाई जमिनबाट बेदखल गर्ने र देशी विदेशी भू–माफियाको हातमा जग्गा केन्द्रित हुन पुग्ने गम्भीर खतरा पुग्ने उनीहरूले जनाएका हुन् ।
अखिल नेपाल किसान महासंङ (अप्फा), अखिल नेपाल किसान महासंघ(क्रान्तिकारी), अखिल नेपाल किसान यूनियन र अखिल नेपाल प्रगतिशील किसान यूनियनका प्रतिनिधिको तर्फबाट प्रेषित वक्तब्यमा भनिएको छ ः “अरु मुलुकमा असफल सावित भइसकेको यो किसान विरोधी र राष्ट्रविरोधी कदम चालेर सरकार स्वदेशी बिदेशी भू–माफियाहरुलाई खुशी तुल्याउन र नेपाली किसानमाथिको शोषणको हिस्सेदार बन्न तर्फ उद्यत देखिन्छ । तसर्थ यो भूमि बैंक परियोजनाको हामी चार किसान संगठन घोर बिरोध जनाउँदछौ र किसान र देश हितमा प्रयुक्त नहुने यस्तो विकास अबधारणा फिर्ता गर्न हामी जोडदार माग गर्दछौं । ”
वक्तब्यमा भनिएको छ ः “हामी बैज्ञानिक क्रान्तिकारी भूमिसुधार गरेर उत्पादक वास्तविक किसानलाई जग्गाको मालिक बनाउन, प्रति इकाई जमिनबाट अधिकतम उत्पादन लिन र राष्ट्रिय उत्पादन बढाउन तथा देशलाई उन्नत र आत्मनिर्भर दिशातर्फ अगसर गराउन जमिन, जल, जंगल, जडीबुटीमाथि स्थानीय किसानलाई सामुहीक स्वामित्व प्रदान गरेर सामुहीक र सहकारी खेतीतर्फ कृषि प्रणालीलाई उद्यत गराउन र कृषि र किसानको जीवनमा आमूल परिवर्तन ल्याउन राष्ट्रको समग्र बिकास गर्ने स्थिति सिर्जना गर्न जोड दिन्छौ । ”
