नेपाल नागरिक उड्डयन प्राधिकरणले बक्यौता नतिरेका सात एयरलाइन्सविरुद्ध कारबाहीको तयारी गरेको छ । अहिले सञ्चालनमा नरहेका तर बक्यौता रहेका सात कम्पनीलाई प्राधिकरणले सात दिनको समयावधि दिएर प्राधिकरणको रकम तिर्न ताकेता गरेको छ । प्राधिकरणले आज एक सूचना जारी गर्दै एयरलाइन्सहरुलाई ताकेता गरेको हो ।
बक्यौता रहेका कम्पनीहरूमा नेकोन एयर, शिवानी एयर, गोरखा एयर, माउन्टेन एयर, कस्मिक एयर, स्काइलाइन एयरवेज र एयर काष्ठमण्डप रहेका छन् । यी कम्पनीहरु अहिले सञ्चालनमा भने छैनन् ।
यसबाहेक विमानस्थल सेवा शुल्क नियमावली अनुसार ती सञ्चालक तथा कम्पनीले भविष्यमा हवाई सेवा, विमानस्थल तथा प्राधिकरणसँग सम्बन्धित कुनै पनि प्रकारको सेवा लिन नपाउने गरी कारबाही हुन सक्ने प्राधिकरणले चेतावनी दिएको छ ।
नेकोन एयरले ४ करोड ७२ लाख २५ हजार, शिवानी एयरले ५५ लाख ५१ हजार, गोरखा एयरले २० लाख ३५ हजार, माउण्टेन एयरले ६ लाख १० हजार,
कस्मिक एयरले ३ करोड ४७ लाख ५८ हजार, स्काइलाइन एयरवेज स् ७ लाख ८० हजार र एयर काष्ठमण्डप ७ लाख ३८ हजार रुपैयाँ प्राधिकरणलाई तिर्न बाँकी रहेको सूचनामा उल्लेख छ ।
प्राधिकरणले ती कम्पनीलाई तोकिएको अवधिमा बक्यौता नतिरेमा कालोसूचीमा समेत राख्ने भएको छ । प्राधिकरणले यी कम्पनीहरुविरुद्ध यसअघि समेत सूचना निकालेर ताकेता गरिसकेको छ ।
प्राधिकरणको बक्यौता नतिरेमा सरकारी बाँकी सरह असुल उपर गर्ने कानुन अनुसार सञ्चालकहरुको जायजेथाबाट असुल उपर हुन सक्ने प्रावधान रहेको छ ।
