सर्वत्र विरोधका वावजुद सत्तारुढ गठबन्धन आजै प्रतिनिधि सभा बैठकमा एमसीसी टेबल गर्ने भएको छ । प्रधानमन्त्री निवास बालुवाटारमा बसेको सत्ता गठबन्धनको बैठकमा एमसीसी आजै टेबल गर्न सहमति जुटेको सरकारका प्रवक्ता समेत रहेका सूचना तथा सञ्चारमन्त्री ज्ञानेन्द्र कार्कीले बताएका छन् ।
यसअघि एमसीसी टेबल गर्ने कि नगर्ने भन्नेमा सत्ता गठबन्धनमा फरक फरक धारणा रहदै आएको थियो । नेकपा (माओवादी केन्द्र) र नेकपा एकीकृत समाजवादीले एमसीसी सम्झौता टेबल गर्न नहुने अडानमा थिए । सत्तारुढ दुई दलले एमसीसीको विरोधमा सडकमा कार्यकर्ता नै उतारेका थिए ।
नेकपा–एस का नेता झलनाथ खनालले भने संविधान विपरित गठबन्धनले एमसीसी टेबल गर्ने निर्णय गरेको समेत आरोप लगाएका छन् । एमसीसी अनुमोदन गर्नको लागि ऐन नै नभएको भन्दै उनले भने ‘संघीय ऐन नबनाई संसदमा टेवुल गर्न सकिदैन । यो संविधान विपरित पनि छ ।
माओवादी केन्द्रका नेता नारायणकाजी श्रेष्ठले पनि आफ्नो पार्टीमा यसबारे छलफल नभएको बताएका छन् । उनले आफ्नो पार्टी अझै पनि एमसीसीको विपक्षमा रहेको बताए ।
