नेपाली उत्पादनको भारतीय बजार प्रवेशमा देखिँदै आएको गुणस्तर प्रमाणीकरणसम्बन्धी प्रक्रियागत झन्झट हटाउन र स्वदेशमै परीक्षण प्रयोगशाला स्थापना गर्न नेपालले भारतसँग प्रस्ताव गरेको छ । भारतीय मानक ब्युरो (बीआईएस) को प्रमाणपत्र लिन लामो समय र ठूलो लागत व्यहोर्नुपर्ने बाध्यता हटाउन उद्योग, वाणिज्य तथा आपूर्तिमन्त्री दीपककुमार साहले भारतीय पक्षसँग यस्तो प्रस्ताव गरेका हुन् ।
३१औँ साझेदारी शिखर सम्मेलनमा सहभागी हुने क्रममा भारतको आन्ध्र प्रदेशस्थित विशाखापट्टनममा भारतीय वाणिज्य तथा उद्योगमन्त्री पीयूष गोयलसँग भएको द्विपक्षीय भेटवार्तामा मन्त्री साहले नेपाली उत्पादनको गुणस्तर परीक्षण तथा प्रमाणीकरण प्रक्रिया सरल र समयबद्ध बनाउन आग्रह गरे । उनले सिमेन्ट, स्टिल, प्लाइउड, जुत्ता, धागोलगायतका औद्योगिक उत्पादनलाई भारतीय बजारमा प्रवेश गर्न सहज हुने व्यवस्था मिलाउन प्रस्ताव गरेको मन्त्रालयले जनाएको छ ।
भेटमा भारतीय मन्त्री गोयलले नेपालमै भारतीय मानक ब्युरोको मापदण्डअनुसार परीक्षण प्रयोगशाला स्थापना गर्ने प्रस्तावप्रति सकारात्मक चासो देखाएका थिए । नेपाली पक्षले उठाएका विषयमा सम्बन्धित निकायबीच समन्वय र प्राविधिक छलफल गरी समाधान खोज्नुपर्ने उनको भनाइ थियो ।
नेपालमै अन्तर्राष्ट्रियस्तरको गुणस्तर परीक्षण तथा प्रमाणीकरण सुविधा उपलब्ध भए नेपाली उद्योगले भारतमा निर्यात गर्दा दोहोरो परीक्षण, अतिरिक्त खर्च र लामो प्रक्रियाबाट मुक्ति पाउने अपेक्षा गरिएको छ । यसले नेपाली उत्पादनको प्रतिस्पर्धात्मक क्षमता बढाउनुका साथै भारतीय बजारमा निर्यात विस्तार गर्न सहयोग पुग्ने विश्वास गरिएको छ । भेटवार्तामा व्यापार तथा पारवहन सहजीकरणका अन्य विषयसमेत उठाइएको थियो ।