पुनर्बीमा कम्पनीका विषयमा विवाद उठेपछि बीमा समितिले स्पष्टोक्ति दिएको छ । पुनर्बीमा कम्पनीलाई पुरै बीमा व्यवसायको एकाधिकार दिने गरी निर्देशन दिइएको भन्दै बीमा व्यवसायी रुष्ट भएको खबर विभिन्न सञ्चारमाध्यममा आएको थियो ।
सोमबार विज्ञप्ति जारी गर्दै बीमा समितिले पछिल्लो समय सञ्चार माध्यममा आएको समाचारबारे गम्भीर ध्यानाकर्षण भएको भन्दै निर्देशनको बचाउ गरेको छ ।
समितिले एक विज्ञप्ति जारी गर्दै प्रचलित नियम अनुसार नै निर्देशन जारी गरिएको दावी गर्दै यसलाई अन्यथा नलिई सहज रुपमा परिपालना गराउन बीमा कम्पनीहरुसँग आग्रह गरेको छ । गुनासाहरु भए बीमा कम्पनी तथा सरोकारवालाहरुसँग छलफल गरेरसमस्या समाधान गर्न सकिने आशस समेत विज्ञप्तिमा उल्लेख छ ।
मुलुकमा विदेशी विनिमय सञ्चिति कम भएको र विदेशी मुद्रा बाहिरिनबाट जोगाउनका लागि यस्तो निर्देशन जारी गरिएको बीमा समितिको जनाएको छ । त्यस क्रममा कुनै विद्यमान कानून तथा निर्देशिकाहरु उलंघन नगरिएको भनाइ बीमा समितिको छ ।
स्वदेशी कम्पनीलाई उनीहरुको आर्थिक क्षमताले नधान्ने पुनर्बीमा व्यवसाय पनि जबरजस्ती उनीहरुलाई नै दिनुपर्ने भन्ने बाध्यात्मक व्यवस्था बीमासमितिको निर्देशनबाट सिर्जना भएको भनेर आएका समाचार आम जनतामा भ्रम सिर्जना गर्ने र बीमा एवं पुनर्बीमा व्यवसायको विकासलाई अवरुद्ध पार्ने नियोजित उद्देश्य भएको गम्भीर आरोप बीमा समितिले लगाएको छ ।
बीमा समितिले गत शुक्रबार बीमा कम्पनीहरुका लागि निर्देशन जारी गर्दै पुनर्बीमा स्वदेशी कम्पनीहरुमा गराउन भनेको थियो । स्वदेशी कम्पनीहरु अस्वीकृत गरेको अवस्थामा मात्रै विदेशी पुनर्बीमा कम्पनीमा पुनर्बीमा गराउन निर्देशन दिइएको छ ।
