वरिष्ठ पत्रकार, सामाजिक अभियन्ता तथा राजनीतिकर्मी  भैरव रिसालको जीवन–भोगाइ समेटिएको पुस्तक ‘भैरव दाइ’ प्रकाशनमा आएको छ । रिसालको ९६औँ जन्मोत्सवको अवसर पारेर घोष्ट राइटिङ्गद्वारा आयोजित कार्यक्रमका बीच गएको श्रावण २८ गते  शनिवार अपरान्ह मानसरोबर पार्टी प्यालेसको सभा कक्षमा खचाखड भीडका बीच उक्त पुस्तक लोकार्पण गरिएको थियाे ।

पुस्तकमा रिसालका निकै रोचक लाग्ने ‘रहरले कम्युनिस्ट, बाध्यताले पत्रकार’, ‘दुई सय रुपैयाँ घुस’, ‘हाम्रै हो लिम्पियाधुरा’, ‘सुशीला, सरकारी पत्रकार’, ‘चर्पी नबनाउनेको घरमा चिया खान्नँ म’, ‘जेल जीवन र राजनीति’, ‘चुनाव’, ‘गाउँको विकास’, ‘पत्रकार’, ‘उहिले बाजेको पालामा’, ‘लोभी पशुपति’, ‘राजासँगका भ्रमण’लगायतका अनुभूतिहरू आदि समेटिएका छन् ।

पुस्तक लोकार्पण गर्दै कार्यक्रमका प्रमुख अतिथि मानवअधिकारकर्मी बरिष्ट जेष्ठ नागरिक गौरीशंकरलाल दासले पुस्तकले भैरवको जीवनलाई उजागर गरेको जनाउँदै उहाँले जीवनमा प्राप्त गरेको उपलब्धि पुस्तकमा समेटिएको उल्लेख गर्नु भयाो । अधिकारकर्मी दासले भैरव रिसालसँगको अनुभूति स्मरण गर्दै भन्नु भयो, ‘म र भैरव भाइले सँगसँगै काम गरेका थियौँ, हाम्रो पुरानो सम्बन्ध छ । पुस्तकमार्फत उहाँले जीवनको भोगाइ समेट्नुभएको छ ।’

वरिष्ठ पत्रकार रिसालले जसले ज्येष्ठ व्यक्तित्वबाट पुस्तक लोकार्पण गराउनु भएको थियो, भन्नु भयाे – मानिसको जिन्दगी कर्कलाको पातको पानी जस्तै हाे । बाेल्ने क्रममा उहाँले 'जीवित रहुञ्जेल राम्रो काम गर्नुपर्ने' कुरामा बिशेषा जोड दिनुभयो । आफूले पुस्तकमार्फत जिन्दगीको अनुभव साटेको उहाँको भनाइको सारांश  थियो ।

लाेकार्पण कार्यक्रममा अतिथिहरू गिभार्णनाथ अर्याल र  दलित अभियन्ता रमा बादीले पनि बाेल्नु हुँदै रिसालजीकाे जीवन र कर्म बारे प्रकाश पार्नु भएकाे थियाे । 

घाेष्ट राइटिङ्गका सञ्चालन कमल ढकालले स्वागत मन्तब्य दिनु भएकाे त्यस कार्यक्रमकाे सञ्चालन घाेष्टराइटिङ्ग कै सहकर्मी तथा नबाेदित साहित्यकार सिर्जना शर्माले गर्नु भएकाे थियाे । कार्यक्रममा समाजका बिभिन्न क्षेत्रका महानुभवाहरूकाे उपस्थिति रहेकाे थियाे ।