उदयपुर, भारी वर्षाका कारण उदयपुरमा सप्तकोशी नदीको बाढी बस्तीमा पसेपछि प्रभावित भएका नौ सयभन्दा बढी परिवारलाई सुरक्षित ठाउँमा सारिएको खबर छ । उनीहरूलाई अस्थायी शिविर बनाएर राखिएको उदयपुरका प्रहरी उपरीक्षक सुवास बोहराले जानकारी दिएका छन्। कतिपय प्रभावित विद्यालयमा आश्रय लिइरहेका छन् भने कतिपय आफन्तकोमा बसेकाे बताइएकाे छ।
उदयपुरकाे सुदूर पूर्वकाे बेलका नगरपालिका वडा नम्बर ८ डुम्रीबोटबाट ५० मिटर लामो बाँध भत्काएर सप्तकोशी नदी बस्तीमा छिरेको हो । सप्तकोसीले आफ्नो धार परिवर्तन गरेका कारण बाढी र डुबानको समस्या बढेको जिल्ला प्रशासन कार्यालय उदयपुरले जनाएको छ । २०४५ सालको भूकम्पअघिको बाटोमा सप्तकोसी फर्किएको हो । २०४५ सालको भूकम्पपछि नदी पूर्व किनारतर्फ गएको थियो ।
सप्तकोसी बस्तीमा पस्दा झन्डै चार हजार मानिस प्रभावित भएका छन् । कोसी बस्तीमा पस्दा बेलका नगरपालिका वडा नम्बर १, २, ८ र ९ का बासिन्दा धेरै प्रभावित भएका छन् । १५ सय परिवारलाई सुरक्षित ठाउँमा सार्नुपर्ने देखिएकाले थप मानिसलाई पनि सुरक्षित ठाउँमा सार्ने काम भइरहेको एसपी बोहराले जानकारी दिए । उद्धारका लागि डुङ्गासहित तीन सय सुरक्षाकर्मी परिचालन भएका छन् ।
