अखिल नेपाल बिद्यार्थी यूनियनको राष्ट्रिय भेला काठमाण्डौमा सम्पन्न भएको छ । अनेबियूका अध्यक्ष सन्देश भटराईद्वारा प्रकाशित प्रेस विज्ञप्तिका अनुसार नेपाल कम्युनिष्ट पार्टीका अध्यक्ष लोकनारायण सुवेदीले तालीकाे गडगडाहटका बीच भेलाको उद्घाटन गर्नुभएको थियो ।
भेलाले २१ सदस्यीय केन्द्रिय समिति र १५ सदस्यीय राष्ट्रिय परिषदको चयन गरेको छ । केन्द्रिय समितको अध्यक्षमा सन्देश भटराई, उपाध्यक्ष सहबाज खान र रोहित कोइराला, महासचिव बिमल शर्मा, सचिवमा उमेश भट्ट र सदस्यहरुमा निरोज ढुंगेल, कुमार पाठक, सुबास ओली, रङ्ग साउद, शुशान्त सेढाई र एमन सइद लगायत हुनुहुन्छ । विभिन्न जिल्लाबाट रिक्त रहेका सदस्यहरुको परिपूर्ति गरिदै जाने निर्णय भेलाले दिएको छ । परिषद सदस्यमा श्रमिक रोक्का, अञ्जेश श्रेष्ठ, रोशन कट्टेल,सुरेश भण्डारी, कुलदीप यादव, आरम्भ साउद, पासाङ शेर्पा, बिक्रम परियार, प्रज्वल शेर्पा, मनोज ढुंगाना, चन्द्र प्रकाश भण्डारी, दिनेश भण्डारी, प्रकाश ढकाल र सुरज आचार्य रहनु भएको छ ।
विद्यार्थी भेला उद्घाटन कार्यक्रमलाई सम्बोधन गर्दै नेपाल कम्युनिष्ट पार्टीका अध्यक्ष सुवेदीले आफ्नो पढाईका साथै क्रान्तिकारी र सचेत बिद्यार्थी समुदायले शैक्षिक, अस्तब्यस्थता र आराजकता, देश र जनतामाथिका पीर मार्काहरु, बाह्य हस्तक्षेप ,समाजका विकृति र विसंगतिहरु, मँहगी भ्रष्टाचार, मूल्यवृद्धि आदिका विरुद्ध जोडदार आवाज उठाउन अग्रसर हुनु पर्नेमा जोड दिनुभएको थियो ।
पार्टीका सचिव तथा बागमती प्रदेशका अध्यक्ष डा. महेन्द्र जोशीले बिद्यार्थीहरुले सही शिक्षा र ज्ञान पाएर देश र समाजको सेवा गर्न सक्षम र तत्पर हुनु पर्ने कुरामा जोड दिनु हुँदै अध्ययनलाई गहिरो र उपलब्धीमूल बनाउदै देश परिबर्तनका लागि संघर्षशील हुनु पनि उत्तिकै आवश्यक छ भन्नु भएको थियो ।
पार्टीका कोषाध्यक्ष तथा अखिल नेपाल महिला यूनियनका अध्यक्ष सीता सुबेदीले सचेत र संघर्षशील बिद्यार्थीहरु किसान, मजदुर, महिला लगायत हेपिएका थिचिएमा मिचिएका बर्ग र समुदायको हक हितमा आवाज उठाउन र संघर्षशील हुनुपर्ने कुरा औंल्याउनु भएको थियो ।
रोहित कोइरालको अध्यक्षतामा सम्पन्न कार्यक्रमको सञ्चालन सन्देश भटराइले गर्नु भएको थियो भने स्वागत सुशील ढुंगाना र धन्यबाद ज्ञापन कुमार पाठकले गर्नु भएको थियो ।
नवनिर्वाचित कार्य समितिलाई पूर्व अध्यक्ष दीपनारायण पाठकले सफलताको शुभकामना दिदै रचनात्मक मस्तिष्क र कौशलतापूर्ण हात भएका बिद्यार्थी बनाउने काम अखिल नेपाल विद्यार्थी यूनियनले गर्दछ र गर्नु पर्दछ भन्नु भयो ।
शुभकामनाकै क्रममा पूर्व महासचिव हरिबोल खत्रीले बिद्यार्थी संगठन क्रान्तिकारी सिद्धान्त, बिचार, नीति र चरित्रले सुसज्जित भएमा मात्र देश र समाजको निमित्त योगदान दिन सक्छ भन्दै त्यो दिशामा लाग्न बिद्यार्थीहरुलाई सल्लाह दिनु भएको थियो ।
पार्टीका अध्यक्ष लोकनारायण सुवेदीले नवनिर्वाचित केन्द्रिय समिति तथा परिषदका सदस्यहरुलाई बधाई तथा शुभकामना दिनुहुँदै अबिर लगाइदिनु भएको थियो ।
भेलाले शिक्षा क्षेत्रका बिसंगतिहरु, महँगी, भ्रष्टाचार, मलको अभाव, तथा बाह्य हस्तक्षेपका बिरुद्ध सशक्त आवाज उठाउने र संघर्षशील बन्ने निर्णयहरु पनि पारित गरेको छ ।
