कोरोना भाइरसको नयाँ भेरिएन्ट ओमिक्रोनले संसारलाई यतिबेला आक्रान्त बनाएको छ । नेपालमा पनि कोरोना जाँच र संक्रमण पुष्टिको दर हेर्ने हो भने सर्वाधिक उचाइमा रहेको छ । बुधबार मात्र ११६५२ जनामा कोरोना भाइरस संक्रमण पुष्टि भएको छ ।
विश्वभरको ट्रेण्डले ओमिक्रोनको संक्रमण दर यस अघिका कुनैपनि भेरियन्टभन्दा बढि छ । फैलिने क्रम अत्यन्त तीब्र भएपनि यस भेरियन्टका कारण ज्यान गुमाउने वा गम्भीर असर पुगेका विरामीको संख्या भने न्यून रहेको छ ।
भाइरसको अध्ययन गरिरहेका विज्ञहरु यो भेरिएन्टको मात्रै असर हेरेर नतीजामा पुग्न नसकिने बताउँछन् । उनीहरुका अनुसार भाइरसको खतरा टरेको छ । विश्व स्वास्थ्य संगठनका अनुसार कारोना संक्रमितको बढ्दो संख्या नै चिन्ताको विषय बनेको छ । भाइरस जति बढि फैलिन्छ त्यति नै यसका नयानयाँ भेरिएण्ट आउने खतरा पनि बढ्न जान्छ ।
नयाँ आउने भेरिएण्टको असर सामान्य हुन्छ वा जटिल त्यसै भन्न सकिँदैन । तर कोरोना प्याण्डेमिक इण्डेमिक नै भइसक्यो भनेर पनि भनिहाल्न नहुने विज्ञहरुको भनाई छ ।
विश्व स्वास्थ्य संगठनको भनाईमा जबसम्म समान रुपले विश्वभर खोप लगाईंदैन, नयाँ भेरिएण्ट उत्पन्न हुने खतरा रहिनै रहन्छ । ओमिक्रोन असर अन्य भेरिएण्ट भन्दा कम भएपनि यसको तीब्र विस्तार नै डरलाग्दो भएको बताइन्छ । जति धेरै म्युटेशन त्यति घातक भेरिएण्ट आउने खतरा रहने बोस्ट युनिवर्सिटीका महामारी विज्ञ लियोनार्डो मार्टिनसको भनाईछ । यसले ल्याउने नयाँ भेरियन्ट ओमिक्रोनभन्दा कमजोर नै हुनेछन् भनेर ठोकुवा गर्न सकिँदैन । साथै अहिले दिइराखिएको खोपले नै ती भेरिएण्टविरुद्ध काम गर्छ गर्दैन भन्ने समेत ठेगान छैन ।
गत नोभेम्बरको मध्यदेखि नै ओमिक्रोनले विश्वभर डढेलो सरी सल्कियो । एक प्रतिवेदन अनुसार ओमिक्रोन डेल्टा भन्दा २ गुणा र शुरुमा वुहानमा भेटिएको भाइरसको दाँजोमा ४ गुना छिटो फैलिइरहेको छ ।
कमजोर प्रतिरक्षा प्रणाली नयाँ भेरिएण्टका खानी
कमजोर प्रतिरक्षा प्रणाली भएका व्यक्तिमा भाइरसका नयाँ भेरिएन्ट उत्पन्न हुने खतरा रहन्छ । यस्ता व्यक्ति संक्रमणको चपेटमा आएमा म्युटेशन हुने अवसर वृद्धि हुन्छ । ओमिक्रोन भेरिएन्ट पनि एचआइभी पीडित संक्रमित हुँदा उत्पन्न भएको जनाइएको छ ।
अर्कोतर्फ जनावरहरुबाट पनि उत्परिवर्तित स्वरुप उत्पन्न हुन सक्छन् । त्यस्तै, हाल विद्यमान ओमिक्रोन र डेल्टा भेरिएन्टको दोहोरो संक्रमणले पनि दुवैको गुण भएको नयाँ भेरिएन्ट आउन सक्ने सम्भावना अन्वेषकहरु औंल्याउँछन् ।
ओमिक्रोनको संक्रमण दर तीब्र भएता पनि घातक असर नदेखिएकाले धेरै देशमा स्वास्थ्य सुरक्षा प्रबन्धमा कडाइ गरिएको छैन । यस्तो अवस्थामा स्वस्थ युवा र विद्यार्थीहरुबीच संक्रमण फैलिँदै गएको छ । यो समुहमा ओमिक्रोनको लक्षणहरु सतहमा नदेखिने तर भाइरस फैलाउन भने सक्ने भएकाले वृद्धवृद्धा र कमजोर प्रतिरक्षा प्रणाली भएका मानिसमा उनीहरुले सहजै संक्रमण सार्न सक्छन् ।
जोन हप्किन्स विश्व विद्यालयका संक्रामक रोग विशेषज्ञ डा. स्टुवर्ट कम्बेलका अनुसार संक्रमणको लामो यात्रामा गम्भीर संक्रमण भएपछि नयाँ भेरिएन्ट निर्माणको आधार तयार हुन्छ । समय वित्दै जाँदा भाइरसक कम घातक हुँदै जाने भन्ने नभएको विज्ञहरुको भनाई छ ।
