सरकारले विभिन्न विश्व विद्यालयले सञ्चालन गरिरहेको परीक्षामा सहभागी विद्यार्थीहरुलाई कोभिड–१९ विरुद्धको खोप दिने भएको छ ।
त्रिभुवन विश्वविद्यालय द्वारा सञ्चालित विभिन्न तहका परीक्षामा सहभागी विद्यार्थीहरुलाई तत्काल खोप दिने निर्णय भएको हो ।
खोपको व्यवस्था मिलाउन ७ वटै प्रदेश र ७७ वटै जिल्लामा पत्राचार गरिसकिएको स्वास्थ्य सेवा विभागका निर्देशक डा। तारानाथ पोखरेलले जनाएका छन् । विभागले ७ वटै प्रदेशका जनस्वास्थ्य निर्देशनालय, ७७ वटै जिल्ला जनस्वास्वास्थ्य कार्यालयलाई परीक्षार्थीलाई खोपको व्यवस्था मिलाउन भनिएको छ । विद्यार्थीहरुले परीक्षा प्रवेशपत्र देखाएर अस्ट्राजेनेका वा भेरोसेलको पहिलो मात्रा खोप लिन पाउनेछन् ।
काठमाडौंको प्रहरी अस्पताल, सैनिक अस्पताल, सशस्त्र प्रहरी अस्पताल र राधास्वामी आइसोलेसन खोप केन्द्रमा गएर विद्यार्थीले खोप लगाउन पाउनेछन् ।
त्रिविले सञ्चालन गरिरहेको र गर्न लागेका परीक्षामा करिब ६० हजार विद्यार्थी रहेको अनुमान छ । परीक्षा केन्द्रबाट संक्रमण फैलने त्रासले विद्यार्थीहरुमा मानसिक चिन्ता थपिएको भन्दै विभिन्न विद्यार्थी संगठनले परीक्षार्थीलाई खोपको व्यवस्था गर्न माग गरेका थिए ।
