माइक्रोसफ्ट इन्कले कम्प्युटर अपरेटिङ सिस्टम विन्डोजको नयाँ भर्सन सार्वजनिक गरेको छ । कम्पनीले विन्डोजको–११ भर्सन सार्वजनिक गरेको हो । ६ वर्ष अघि सन् २०१५ मा विन्डोज–१० भर्सन रिलिज भएको थियो ।
विन्डोजको यो भर्सन फ्रेस एअरी लुकको साथमा नयाँ फिचर र डिजाइन समेटिएको छ । विन्डोज–११ ले आफ्नो स्टार्ट मेनुका साथै थिमहरुमा परिवर्तन गरेको छ भने ग्राफिक डिस्प्ले उम्दा रहेको छ । यससँग माइक्रोसफ्ट टिम लगायतका धेरै सफ्टवेयरहरु समेटिएको छ । विन्डोज ११ ले कतिपय एन्ड्रोइड एप्लिकेसनहरु पनि चलाउन सकिनेछ । स्न्याप ग्रुपले एप्लिकेसनहरु चलाउन सहज हुनेछ भने र स्न्याप लेआउटले मल्टी टास्किङको सुविधा दिनेछ ।
विन्डोज ११ सार्वजनिक गर्दै कम्पनीका सीइओ सत्य नाडेलाले यो भर्सनले कनेक्टिविटीलाई विशेष जोड दिएको उल्लेख गरे । कम्प्युटर गेम खेल्नका लागि पनि विन्डोजको यो भर्सन पहिलेभन्दा धेरै उपयुक्त रहेको बताइएको छ ।
यसका लागि कम्प्युटर हार्डवेयर रिक्वायरमेन्ट भने लेटेस्ट चाहिने छ । विन्डोज ११ इन्स्टल गर्न तपाईंको कम्प्युटरमा न्यूनतम १ गिगाहट्र्जको ६४ बीट प्रोसेसर, ४ जीबी मेमोरी र ६४ जीबी स्टोरेज आवश्यक पर्नेछ । विन्डोज ११ को होम इडिसन आगामी अक्टोबर–नोभेम्बरमा पर्सनल कम्प्युटरहरुमा प्रयोगमा ल्याउन सकिने माइक्रोसफ्टले जनाएको छ ।
