इन्स्टिच्यूट अफ चार्टर्ड अकाउन्ट एसोसिएसन(आइक्यान)को नवौं परिषद् निर्वाचित् भएको छ । परिषदमा चार्टर्ड अकाउन्टेन्टहरुको तर्फबाट १० जना, रजिष्टर्ड अडिटरहरुको तर्फबाट ४ जना र सरकारी प्रतिनिधि ३ जना रहने व्यवस्था ।
३ वर्षे कार्यकालका लागि भएको निर्वाचनमा रजिष्टर्ड अडिटरहरु(आरए) तर्फ ९ जनाबीच प्रतिष्पर्धा भएको थियो भने सिएतर्फ १६ जनाबीच प्रतिष्पर्धा रहेको थियो । पार्षदमा आरएका तर्फबाट निर्वाचित हुनेमा भोलानाथ पाठक, पोषराज नेपाल, शंकर ज्ञवाली, केशबहादुर केसी रहेका छन् । रजिष्टर्ड अडिटरतर्फ अडिटर्स एसोसिएसन नेपाल(अडान) का आधिकारिक ४ उमेदवार नै विजयी भएका हुन् ।
त्यसैगरी सिएका तर्फबाट निर्वाचित हुने पार्षदहरुमामा सन्तोष काफ्ले, भास्करसिंह लाला, युद्धराज ओली, क्षेत्रगोपाल प्रधान, सुजन काफ्ले, सुरेन्द्र श्रेष्ठ, रामचन्द्र खनाल, सुजन श्रेष्ठ, पियुष आनन्द र प्रविणकुमार झा छन् । उपत्यका बाहिर हुलाक मतपत्र र उपत्यकाभित्र भौतिक उपस्थितिमा एकल संक्रमणीय मताधिकारको प्रयोग गरी पार्षदहरु चुनिएका हुन् ।
नवनिर्वाचित परिषद बैठकले नयाँ अध्यक्ष र उपाध्यक्ष चयन गर्नेछ । अध्यक्ष र उपाध्यक्ष चयनमा रजिष्टर्ड अडिटरहरुले मत हाल्न पाउने भएपनि सो पदमा उमेदवारी दिन भने पाउँदैनन् । आरएका तर्फबाट विजयी पार्षदहरुले अध्यक्ष र उपाध्यक्षमा उमेदवार हुन नपाउने विभेदपूर्ण आईक्यान रहेको छ ।
त्यसैगरी आरएहरुको दर्ता दिँदा क वर्ग नै नराखी ख, ग र घ वर्गमात्रै दिइएको छ भने अडिटका लागि समेत सीमा तोकिएको छ । योग्य, सक्षम र अनुभवका आधारमा अडिटरहरुलाई अडिट गर्न सीमा तोक्न नहुने आवाज उठ्दै आएको छ । त्यसैगरी वि.सं. २०८१ बाट रजिष्टर्ड अडिटरहरु स्वतः निष्क्रिय हुने व्यवस्था लागु गर्न नहुने र यसले पेशा गर्न पाउने उनीहरुको अधिकार कुण्ठित हुने भन्दै नयाँ आरए दर्ता नदिइएको हालको अवस्थामा भविष्यमा स्वतः नै नरहने भएकाले समयसीमा आवश्यक नरहेको भनाई आरएहरुको छ ।
