अर्थमन्त्री जनार्दन शर्माले पुँजी बजारमा देखिएको समस्या समाधान गर्न गभर्नर महाप्रसाद अधिकारीलाई निर्देशन दिएका छन् । राष्ट्र बैंकद्वारा जारी मौद्रिक नीति र निर्देशिकापछि पुँजी बजारमा देखिएको स्थितिका सम्बन्धमा टेलिफोन गरेर मन्त्री शर्माले तत्काल समस्या समाधान गर्न आज निर्देशन दिएका हुन् ।
अर्थमन्त्री शर्माले आवश्यक पर्ने सुधार गरेर पुँजी बजारको समस्या समाधान गर्न गभर्नरलाई निर्देशन दिएका हुन् । जवाफमा गभर्नर अधिकारीले आवश्यक प्रक्रिया मिलाई परिस्थिति सहज बनाउन प्रयास गर्ने प्रतिवद्धता जनाएका छन् ।
गभर्नरको राजीनामाको माग
यता पुजीँबजार सुधार संघर्ष समितिले भने नेपाल राष्ट्र बैंकका गभर्नर महाप्रसाद अधिकारीको राजीनामाको माग गरेको छ । अर्थ मन्त्रालयलाई समेत बोधार्थ दिएर आज बुझाइएको ज्ञापनपत्रमा १८ बुँदे माग राख्दै गभर्नरको राजिनामा मागेका हुन् ।
नेपाल राष्ट्र बैंकबाट पुँजी बजारको अस्तित्वनै धरापमा पार्न नियोजित रुपमा तयार गरिएका नीति कार्यक्रम र कार्यनीतिहरुले समग्र पुँजीबजार अघि बढ्न नसकेको उनीहरुले जनाएका छन् ।
