अमेरिका भ्रमणमा रहनु भएका चिनीयाँ राष्ट्राध्यक्ष महामहीम शी चिनफिङको स्वागतमा अमेरिकी राष्ट्रपति डोनाल्ड ट्रम्पले ह्वाइट हाउसमा स्वागत समारोहको आयोजना गर्नु भएको छ। उक्त समारोहलाई राष्ट्राध्यक्ष शी चिनफिङले सेप्टेम्बर २४ तारिख सम्बोधन गर्नु भयाे। राष्ट्राध्यक्ष शीको सम्बोधन पूर्ण पाठ यस प्रकार रहेको छ:
महामहिम राष्ट्रपति ट्रम्प र श्रीमती मेलानिया,
महिला तथा सज्जनहरू, मित्रहरू !
सुन्दर संयुक्त राज्य अमेरिकाको राज्यभ्रमण गर्न पाउँदा मलाई खुसी लागेको छ। राष्ट्रपति ट्रम्प र श्रीमतीले म र मेरी श्रीमतीलाई दिनुभएको न्यानो आतिथ्यका लागि धन्यवाद। सर्वप्रथम, १ अर्ब ४० करोडभन्दा बढी चिनियाँ जनताका तर्फबाट अमेरिकी जनतालाई हार्दिक अभिवादन व्यक्त गर्दै अमेरिकाको स्वतन्त्रताको २५०औँ वार्षिकोत्सवमा हार्दिक बधाई दिन्छु!
चीन र अमेरिका दुवै महान् देश हुन्, चिनियाँ जनता र अमेरिकी जनता दुवै महान् जनता हुन्। राष्ट्रपति ट्रम्पको निमन्त्रणामा मेरो यो अमेरिका भ्रमण मित्रता जोगाउन, सहकार्य विस्तार गर्न र दुई देशका जनताको कल्याण बढाउनका लागि हो।

आजको संसारको परिवर्तन, युगको परिवर्तन र ऐतिहासिक परिवर्तनको सामना गर्दा चीन र अमेरिका जस्ता दुई ठूला देशले मानव जातिको विकास र प्रगतिलाई अगाडि बढाउने ऐतिहासिक जिम्मेवारी वहन गरेका छन्।
यस वर्ष राष्ट्रपति ट्रम्पको चीन भ्रमणका क्रममा हामीले चीन–अमेरिका बीच रचनात्मक रणनीतिक स्थिर सम्बन्ध निर्माण गर्न सहमत भयौं, जसलाई दुई देशका जनता र अन्तर्राष्ट्रिय समुदायले व्यापक रूपमा स्वागत गरेका छन्। राष्ट्रपति ट्रम्पसँग मिलेर चीन–अमेरिका सम्बन्धको यो जहाजलाई स्थिर रूपमा अगाडि बढाउन म प्रयास गर्न चाहन्छु।
— हामीले सञ्चारलाई बलियो बनाउनुपर्छ। चीन र अमेरिकाको राष्ट्रिय अवस्था फरक छ। खुला, गहिरो र निरन्तर वार्ताद्वारा आपसी बुझाइ बढाउन, समानता खोज्दै भिन्नता स्वीकार गर्न र आपसी विश्वास सञ्चित गर्न सकिन्छ। राष्ट्रपति ट्रम्प र म एकअर्कालाई सम्मान गर्छौं, राम्रो सम्बन्ध स्थापना गरिसकेका छौं र नियमित सञ्चार राख्छौं। हामीले दुई देशको कूटनीति, अर्थवाणिज्य, वित्त, कानुन प्रवर्तन, मानवीय आदि विभागहरू बीच सञ्चार बढाउन प्रोत्साहित गर्छौं र दुई देशको विधायिका बीचको आदानप्रदान विस्तार गर्न समर्थन गर्छौं।
— हामीले इमानदारीपूर्वक सहकार्य गर्नुपर्छ। चीन र अमेरिकाको हितहरू गहिरो रूपमा जोडिएका छन्, सहकार्यको क्षेत्र धेरै फराकिलो छ। चीन–अमेरिका सहकार्यले संसारका सबै समस्या समाधान गर्न नसके पनि, दुई देशको सहकार्य नहुँदा संसारका धेरै समस्या समाधान गर्न गाह्रो हुन्छ। चीनको खुलापनको ढोका सधैं खुला रहन्छ। अमेरिकी उद्यमहरूलाई चीनमा लगानी गर्न र व्यवसाय गर्न स्वागत गर्छौं। अमेरिकी पक्षले चिनियाँ उद्यमहरूसँग निष्पक्ष व्यवहार गरोस्, सहकार्यको सूची लम्ब्याउन र समस्याको सूची घटाउन मिलेर काम गरौं। चीन र अमेरिका दुवै कृत्रिम बुद्धिमत्ताको क्षेत्रमा ठूला देश हुन्। कृत्रिम बुद्धिमत्ताको विकास र नियमन गर्ने क्षमता र जिम्मेवारी हामीसँग छ, ताकि कृत्रिम बुद्धिमत्ताको विकास मानिसको नियन्त्रणमा रही मानव जातिको हितमा काम गरोस्। चिनियाँ पक्षले अमेरिकासँग लागू पदार्थ नियन्त्रण, कानून प्रवर्तन आदि क्षेत्रमा सहकार्य बढाउन चाहन्छ। दुई देशबीच सीधा हवाई उडान बढाउन सकिन्छ, जसले मानव र वाणिज्यिक आदानप्रदानलाई सहज बनाउनेछ।
— हामीले शान्तिपूर्ण रूपमा सहअस्तित्वमा रहनुपर्छ। मैले धेरै पटक भनेको छु, चीन र अमेरिका जस्ता ठूला देशले मिलेर काम गर्दा दुवैको लाभ हुन्छ र झगडा गर्दा दुवैलाई हानि हुन्छ। चीन र अमेरिकाले प्रतिस्पर्धालाई लुकाउनुपर्दैन तर प्रतिस्पर्धा स्वस्थ र सीमित हुनुपर्छ। यो एकअर्कालाई पछ्याउने दौड हुनुपर्छ, न कि एकले जित्ने अर्कोले हार्ने लडाइँ। चीन र अमेरिकाले द्वन्द्व नहुने र एकअर्काको विरोध नगर्ने आधारभूत सीमा कायम राख्नुपर्छ। र यस ग्रहमा दुई ठूला देशको सहअस्तित्वको सही मार्ग हामीले पक्कै पत्ता लगाउन सक्छौं। दुई देशको सेनाले नियमित वार्ता कायम राख्नुपर्छ र संकट सञ्चार तथा रोकथाम संयन्त्रलाई परिष्कृत गर्नुपर्छ। थ्युसिडाइड्सको जालो पार गर्न सकिन्छ।

महिला तथा सज्जनहरू, मित्रहरू !
दोस्रो विश्वयुद्धको समयमा चीन र अमेरिकाले सँगै फासिवाद आक्रमणको सामना गरेका थिए। यो इतिहास चिनियाँ जनताले बिर्सेका छैनन्, अमेरिकी जनताले पनि बिर्सेका छैनन्। चीन–अमेरिका सम्बन्धको आशा जनतामा छ र भविष्य युवाहरूमा छ। यहाँ म घोषणा गर्न चाहन्छु कि आगामी ५ वर्षमा चीनले १० हजार अमेरिकी किशोरकिशोरीहरूलाई चीनमा आदानप्रदान र अध्ययन गर्न आमन्त्रित गर्नेछ।
पाण्डा चीन र अमेरिकी जनताबीचको मित्रताको दूत हो। आज म एउटा राम्रो खबर साझा गर्न चाहन्छुः केही दिनपछि पाण्डा “फिङफिङ” र “फुसुआङ” एटलान्टा चिडियाखानामा बसोबास गर्नेछन् र अमेरिकी जनतासँग भेट्नेछन्।
महिला तथा सज्जनहरू, मित्रहरू!
चिनियाँ राष्ट्रको पुनःउत्थानको साकार पार्ने काम र अमेरिकालाई पुनः महान् बनाउने लक्ष्य एकअर्काको बाधक होइन। हामीले जनताप्रतिको भावना राखेर ऐतिहासिक पहल देखाउँदै चीन र अमेरिकी जनताबीचको मित्रताको कामलाई निरन्तर अगाडि बढाऔं र मिलेर अझै राम्रो संसार निर्माण गरौं!
धन्यवाद!