Wednesday, 20 January, 2021    |    २०७७ माघ ७ गते , बुधवार

कृषिमा विदेशी लगानी भित्र्याउँदा सरोकारवालासँग छलफल गर्न उद्यमीहरुको सुझाव


२०७७ पौष २७ गते , सोमवार प्रकाशित

कृषि क्षेत्रमा विदेशी लगानी खुला गर्ने सन्दर्भमा त्यससँगै भित्रिने प्रविधि, यसले उपयोग गर्ने कच्चा पदार्थ र निर्यातको अवस्था हेरेरमात्र निर्णय गर्नु उचित हुने सुझाव उद्योगी व्ययवसायीहरुले दिएका छन् ।  

नेपाल उद्योग वाणिज्य महासंघ, नेपाल उद्योग परिसंघ र नेपाल चेम्बर अफ कमर्सले संयुक्त विज्ञप्ति जारी गर्दै उच्चतम प्रविधि भित्राउने, स्वदेशी कच्चा पदार्थ उपयोग गर्ने र अधिकांश हिस्सा निर्यात गर्न सक्ने सम्भाव्यताको विस्तृत अध्ययन गरेरमात्र कृषिमा विदेशी लगानी खुला गर्ने निर्णय कार्यावन्यनमा लगिनु पर्ने जनाएका छन् । 

सरकारले गएको पुष २० गते राजपत्रमा प्रकाशित गरेर कृषिमा विदेशी लगानी खुला गर्ने जनाएको थियो । सरकारको यो निर्णय विरुद्ध विभिन्न कृषि उद्यमसंग सम्बन्धित संघसंस्थाले विरोध गरिरहेकोमा आफूहरुको ध्यानाकर्षण भएको उनीहरुले जनाएका छन् ।

२०७५ चैतमा आएको नयाँ विदेशी लगानी तथा प्रविधि हस्तान्तरण ऐनले कृषिमा विदेशी लगानी पुर्णतः बन्देज गरेको सन्दर्भमा मन्त्रीपरिषदको निर्णयबाट आफूले उत्पादन गरी कम्तीमा ७५ प्रतिशत निकासी गर्ने पशुपंन्छीपालन, माछापालन, मौरीपालन, फलफुल, तरकारी, तेलहन, दलहन, दुग्ध व्यवसाय र कृषिका प्राथमिक उत्पादनसंग सम्बन्धित ठूला उद्योगमा विदेशी लगानी गर्न पाउने गरी भएको व्यवस्थाको यससंग सम्बन्धित उद्यमीहरुले बिरोध गरिरहेका हुन् । 

कृषि जस्तो सर्वसाधारणको जिविकासंग प्रत्यक्ष जोडिएको बिषयमा विदेशी लगानी भित्राउन नहुने एउटा तर्क छ भने बढदो व्यापार घाटा कम गर्न एवं उत्पादन र उत्पादकत्व बढाउन विदेशी लगानी र प्रविधि आवश्यक रहेको बिषय पनि उठिरहेको छ ।  

यस सन्दर्भमा महासंघ, परिसंघ र चेम्बरले यससंग सरोकारवाला निकायसंग छलफल गरी कृषिमा विदेशी लगानीबारे निर्णय लिन सरकारलाई सुझाएका छन् । 

विदेशी लगानी मुलुकका लागि अत्यावश्यक भएको सन्दर्भमा उक्त लगानीलाई प्रवद्र्धन गर्न सरकारले जनाएका विगतका प्रतिवद्धता पुरा गर्नु आवश्यक रहेको भन्दै सम्बन्धित नीति नियम, निर्देशिका, कार्यविधि बनाउदा वा कुनै संसोधन गर्दा निजी क्षेत्रसंग अनिवार्य रुपमा छलफल गर्न पनि उनीहरुले माग गरेका छन् । 
 

लोकप्रिय

img-4.gif

सम्बन्धित समाचार


Leave a Comment

9f5e7db1d677b1906a34b1e17e0be317.gif