Thursday, 23 May, 2019    |    २०७६ जेष्ठ ९ गते , विहीवार

नेपालको मौसम पनि समुद्री आँधी फानी र पश्चिमी वायुले प्रभावित


२०७६ बैशाख २० गते , शुक्रवार प्रकाशित

  हिन्द महासागर स्थित बङ्गालको खाडीमा उत्पन्न भएको शक्तिशाली समुद्री आँधी फानी पूर्वोत्तर भारतको तटीय क्षेत्रमा आइपुग्दा त्यसको आंशिक प्रभाव नेपालको पूर्वी र मध्य भागमा पनि देखिएको नेपालको मौसम पूर्वानुमान महाशाखाले जनाएको छ ।    यसका अतिरिक्त नेपालको आजको मौसममा पश्चिमी वायु सक्रिय भएर पूर्वतिर हानिँदा पश्चिम र मध्य नेपालका विभिन्न स्थानको मौसम पनि प्रभावित भएको वरिष्ठ मौसमविद् राजु प्रधानाङ्गले बताएका छन् । 


  पश्चिम नेपालका विभिन्न स्थानमा शुक्रवार बिहान चट्याङ परेको र हावाहुरीकासाथ  वर्षा भएको थियो ।     मौसमबिद् प्रधानाङ्गका अनुसार काठमाण्डू उपत्यका र नजिकैका क्षेत्रमा अहिले पश्चिमी वायुको प्रभावका कारण बादल लागेको र मेघगर्जनसहित पानी परेको हो।       प्रतिघढटा झन्डै २०० किलोमिटरको वेगले अघि चलेको समुद्री आँधी फानीको प्रभावले भारतको तटीय क्षेत्रमा आज बिहानदेखि नै वर्षा हुन थालेको थियो।   प्रधानाङ्गका अनुसार – “समुद्री आँधीको प्रणाली ठूलो हुन्छ। फानीको आकार नेपालभन्दा ठूलो छ। बङ्गालको खाडीबाट ओडिशामा प्रवेश गर्दा त्यो समुद्री आँधीले नेपाल वरिपरिको बादललाई छोइसक्यो ।’’उनका अनुसार फानी उत्तर दिशातिर सर्दै बाङ्ग्लादेशतिर अघि बढ्दा पूर्वी तथा मध्य नेपालमा शुक्रवार राति अझ प्रभाव पर्नेछ । 
  उता भारतको मौसम विभागले जनाए अनुसार स्थानीय समयानुसार फानी नामको आँधी बिहान आठ बजेतिर ओडिशा आइपुगेको थियो     छ घण्टा चले पछि यसको शक्ति केही क्षीण हुँदै बलियो हावाहुरीको रूप लिन सक्ने उसले बताइएको छ।   फनीको सम्भावित मार्गमा पर्ने स्थानबाट झन्डै १० लाख मानिसलाई सुरक्षित स्थानमा सारिएको भारतका अधिकारीहरूले बताएका छन्।   यो आँधी फानी यद्यपि सोझै नेपालमा नआउने भए पनि नजिकैको बाटोबाट उत्तरतिर जाने मौसमविद्हरू बताउँछन् ।   तर फानीले मौसममा प्रभाव पार्ने हुँदा नेपालमा मेघगर्जन हुने, चट्याङ पर्ने र हावाहुरीसहित हल्का तथा मध्यम वर्षा हुने महाशाखाको पूर्वानुमान रहेको छ।   हिमाली क्षेत्रमा ठूलो हिमपात हुने सम्भावना औँल्याउँदै फानीको प्रभाव बाँकी रहेसम्म पर्वतारोहण गर्न उपयुक्त नहुने प्रधानाङ्गले बताएका छन् ।   यता नेपालमा वसन्त ऋतुमा हिमाल आरोपहण गर्न सयौँ स्वदेशी तथा विदेशी पर्वतारोही, पथप्रदर्शक र सहयोगीहरू सगरमाथालगायत विभिन्न हिमालको आधारशिविरमा यतिबेल भेला भएका हुन्छन् र छन् ।   महाशाखाका अनुसार आइतवारदेखि मौसममा क्रमिक रूपमा सुधार आउने सम्भावना छ । यस अघि सन् २०१४ मा आएको समुद्री आँधीको प्रभावले नेपालका हिमाली क्षेत्रमा ठूलो हिमपात भएको थियो।
  त्यतिबेला हिमपात र हिमपहिरोमा परेर कम्ती तीन दर्जन व्यक्तिको मृत्यु भएको थियो भने चार सय जनाभन्दा बढीलाई जीवितै उद्धार गरिएको थियो ।   मौसममा भएको परिवर्तनलाई दृष्टिगत गर्दै नेपालको पर्यटन विभागअन्तर्गत रहेको होटल तथा पर्वतारोहण शाखाले पर्यटक तथा तिनलाई व्यवस्थापन गर्ने जिम्मा लिएका एजेन्सीहरुलाई मौसमको विचार गरेर सुरक्षित रहन सूचना प्रकाशित गरेको छ ।  

लोकप्रिय

img-4.gif

सम्बन्धित समाचार


Leave a Comment

9f5e7db1d677b1906a34b1e17e0be317.gif